هه‌ر چه‌نده‌ ل رۆژێن بۆرى، كوژمێ 6 ملیار دینار ژ پارێ جۆتیاران ژ به‌غدا گه‌هشتیه‌ پارێزگه‌ها دهۆكێ و هاتیه‌ به‌لاڤكرن، لێ ل دویڤ گۆتنا رێڤه‌به‌ریا بازرگانیا ده‌خل و دانى ل پارێزگه‌ها دهۆكێ به‌غدا ب كوژمێ 211 ملیار دیناران ده‌یندارێ جۆتیارێن پارێزگه‌ها دهۆكێ یه‌.

نازم محه‌مه‌د عه‌لى، رێڤه‌به‌رێ رێڤه‌به‌ریا بازرگانیا ده‌خل و دانى ل پارێزگه‌ها دهۆكێ دیار كر: "جۆتیارێن پارێزگه‌ها دهۆكێ ب هه‌مان ره‌نگێ جۆتیارێن پارێزگه‌هێن دیتر یێن هه‌رێما كوردستانێ گه‌نمێ خۆ بۆ به‌غدا دهنێرن، لێ دلگرانى ڤه‌ مافێن ڤان جۆتیاران تا نۆكه‌ نه‌هاتنه‌ دابینكرن كۆ به‌غدا ب كۆژمێن مه‌زن یێن پاره‌ى ده‌یندارێ جۆتیارێن پارێزگه‌ها دهۆكێ یه‌ و هه‌ر چه‌نده‌ ل ده‌مێن چه‌ند رۆژێن بۆرى دا، شه‌ش ملیار دینار پارێ جۆتیاران گه‌هشتیه‌ دهۆكێ و هاتیه‌ به‌لاڤكرن لێ تا نۆكه‌ به‌غدا ب كوژمێ زێده‌تر ژ 211 ملیار دیناران ده‌یندارێ جۆتیارێن مه‌یه‌".

رێڤه‌به‌رێ رێڤه‌به‌ریا بازرگانیا ده‌خل و دانى ل پارێزگه‌ها دهۆكێ گۆت ژى:" ژ وان سالێن پارێ جۆتیاران نه‌هاتنه‌ هنارتن سالا 2014 كۆ ب كوژمێ 18 ملیار دیناران و سالا 2015 ب كوژمێ 71 ملیار دیناران و سالا 2016 88 ملیار دینارن دگه‌ل سالا 2020 كۆ پارێ جۆتیارێن پارێزگه‌ها دهۆكێ ل دویف مافێ گه‌نمێ وان پارێ ڤان جۆتیاران 56 ملیار دینار گه‌هشتبانه‌ وان لێ تا نۆكه‌ بتنێ 21 ملیار و 500 ملیون دینار ژ پارێ سالا بۆرى یا 2020 گه‌هشتیه‌ جۆتیاران و ئه‌م دشێن بێژن به‌غدا ب كوژمێ زێده‌تر ژ 211 ملیار دیناران ده‌یندارێ جۆتیارێن پارێزگه‌ها دهۆكێ یه‌ و هیڤیخوازین ل ده‌مێن نێزیك دا كار ل سه‌ر وێ چه‌ندێ بهێت كرن ئه‌و پارێ مایى بگه‌هیته‌ جۆتیاران تا كۆ مافێ وان نه‌هێته‌ خوارن".














باسنیوز