ئێوارەی ئەمڕۆ پەرلەمانتارانی هاوپەیمانی هیوا لەگەڵ مستەفا کازمی، سەرۆکوەزیرانی عێراق کۆبوونەوە. پەرلەمانتارێکی هاوپەیمانییەکە دەڵێت، کازمی بەڵێنیداوە شایستەداراییەکانی جووتیاران و پرسی فەرمانگە فیدراڵییەکان بباتە کۆبوونەوەی داهاتووی ئەنجوومەنی وەزیران.

هۆشیار عەبدوڵڵا، پەرلەمانتاری هاوپەیمانی هیوا راگەیاند: "لە کۆبوونەوەکە لەگەڵ سەرۆکوەزیرانی عێراق کە ئێوارەی ئەمڕۆ چوارشەممە بەڕێوەچوو، باسی پرسی گەنمی جووتیاران و شایستەداراییەکانی فەرمانگە فیدراڵییەکان لەگەڵ کۆمەڵێک پرسی دیکە کرا کە مستەفا کازمی پێی راگەیاندین، لە کۆبوونەوەی داهاتووی ئەنجوومەنی وەزیران یەکلایی دەکەنەوە".

بەگوتەی هۆشیار عەبدوڵڵا "مستەفا کازمی پێی راگەیاندین کە شایستە داراییەکانی جووتیاران، پێدانی قەرزی کشتوکاڵی و هاوکاریکردنی زیاتری جووتیاران لەسەرتاسەری عێراق وەک پرۆژەیەکی نیشتمانیی دەباتە ئەنجوومەنی وەزیران".

هۆشیار عەبدوڵڵا ئەوەشی راگەیاند، راگەیێندراوێکیان لەبارەی ناوەڕۆکی کۆبوونەوەکە دەبێت و کەمێکی دیکە بڵاوی دەکەنەوە.
rudaw -