ئێوارەی ئەمڕۆ دووشەممە لە هەولێر نێچیرڤان بارزانی، سەرۆکی هەرێمی کوردستان لەگەڵ ستیڤن هیکی، باڵیۆزی بەریتانیا لە عێراق کۆبووەوە.

لە کۆبوونەوەکەدا پەرەپێدانی پەیوەندییەکانی بەریتانیا و هەرێمی کوردستان، رۆڵی کۆمەڵگەی نێودەوڵەتی لە یارمەتیدانی عێراق و هەرێمی کوردستان، یارمەتیدانی بەریتانیا بۆ بەهێزکردنی دامەزراوەکان و پرۆسەی چاکسازی لە عێراق و هەرێمی کوردستان، دوایین هەنگاوەکانی گفتوگۆی هەولێر – بەغدا، پرسی بودجە و پشکی هەرێمی کوردستان، دۆخی ناوخۆی هەرێم، رێککەوتنی شەنگال، مەترسییەکانی تیرۆر و سەرهەڵدانەوەی داعش، هەڵبژاردنەکانی داهاتووی عێراق و پێشبینیی نەخشەی سیاسیی دوای هەڵبژاردنەکان، تاوتوێ کران.

نێچیرڤان بارزانی، جەختی لە ئامادەیی و خواستی هەرێمی کوردستان بۆ چارەسەرکردنی یەکجارەکیی تەواوی کێشەکان لەگەڵ بەغدا لەسەر بنەمای دەستوور و گرنگیی جێگیربوونی سیستمی فیدراڵی کردەوە و ئاماژەی بەوە دا کە چارەسەرکردنی کێشەکانی هەرێمی کوردستان لەگەڵ حکوومەتی فیدراڵ، کلیلی ئارامی و سەقامگیریی ئێستا و داهاتووی عێراقە.

لە کۆبوونەوەکەدا کە جەیمس سۆرنتن کونسوڵی گشتیی بەریتانیا لە هەولێر ئامادەی بوو، هەردوولا هاوڕا بوون لەسەر گرنگیی جێبەجێکردنی رێککەوتنی شەنگال و گەیشتنی هەولێر و بەغدا بە رێککەوتن و چارەسەرکردنی کێشەکانیان. هەروەها باڵیۆزی بەریتانیا ئامادەییی وڵاتەکەی بۆ بەردەوامیی هاوبەشی و پشتگیری لە عێراق و هەرێمی کوردستان، دووپات کردەوە.
k24 -