سه‌رۆك مه‌سعود بارزانی به‌بۆنه‌ی كۆچی دوایی عیزەت سلێمان بەگ دەرگەڵەیی كەسایەتیی ناسراوی كوردستان و دەڤەری سۆران و هاوكات پێشمه‌رگه‌ی شۆڕشی ئه‌یلوول، په‌یامێكی سه‌ره‌خۆشی ئاراسته‌ی خانه‌واده‌ و كه‌س و كاری كۆچكردوو كرد.

ده‌قی پرسه‌نامه‌ی سه‌رۆك بارزانی بۆ كۆچی دوایی عیزەت سلێمان بەگ دەرگەڵەیی:

بەناوی خودای بەخشندە و میهرەبان

بە داخێكی زۆرەوە هەواڵی كۆچی دوایی عیزەت سلێمان بەگ دەرگەڵەیی كەسایەتیی ناسراوی كوردستان و دەڤەری سۆران و، پێشمەرگەی شۆڕشی ئەیلوولم بیست. خوالێخۆشبوو عێزەت سلێمان بەگ لە خانەوادەیەكی ناودار و كوڕی سلێمان بەگ پێشمەرگەی كۆماری كوردستان لە مەهاباد و یاوەری بارزانیی نەمر بۆ سۆڤییەت بوو و، كەسایەتییەكی خەباتگێڕ و نیشتیمانپەروەر و خەمخۆری كوردایەتی و وەفاداری ڕێبازی بارزانی بوو و، ڕۆڵی بەرچاوی هەبوو لە شۆڕش و خەباتی كوردایەتی بە تایبەتی لە دەڤەری سۆران و لەدەست دانی خەسارەتێكی گەورەیە.

سەرەخۆشی خۆم ئاراستەی خانەوادەی تێكۆشەری عێزەت سلێمان بەگ و هەموو خزم و كەسوكار و ئاشنایان و هەڤاڵانی خوالێخۆشبوو و نیشتیمانپەروەرانی كوردستان دەكەم و خۆم بە هاوبەشی خەمیان دەزانم.

لە خودای گەورە داواكارم رۆحی خوالێخۆشبوو بە بەهەشتی بەرین شاد بكات و سەبر و ئارامی بە هەموو لایەك ببەخشێت.

انا للە و انا الیە راجعون

مسعود بارزانی

30ـی كانوونی دووەمی 2021
k24 -