لە کۆمەڵگەی (گرزەرک)ی سەر بە ناحیەی گرعوزێر لە قەزای شنگال، ڕووفاتی سێ هاووڵاتیی کوردی ئێزدی دۆزراونەتەوە.

ئەمڕۆ چوارشەممە ٢٧ی١ی٢٠٢١ جەلال خەلۆ بەڕێوەبەری ناحیەی گرعوزێر بە وەکالەت ڕايگەیاند: "دوێنێ سێشەممە ئەو سێ ڕووفاتە لە کۆمەڵگەی گرزەرک دۆزراونەتەوە کە ڕووفاتی سێ هاووڵاتیی کوردی ئێزدییە کە لە شوێنێک لەلایەن تیرۆریستانی داعش لە ساڵی ٢٠١٤ گوللەباران کراون".

گوتیشی: "پۆلیسی شنگال لەو ڕووداە ئاگادار کراوەتەوە هەتا بپارێزرێن و بیانگوازنەوە و ڕووفاتەکانیان لەناو گۆڕی بەکۆمەڵی ئێزدییاندا بنێرژرێن".

جەلال خەلۆ ئاماژەی بەوەش کرد: "هێشتا ناسنامەی ئەو سێ رووفاتە دیار نییە کە پاش شەش ساڵ لە کارەستانی جینۆسایدی شنگال دۆزراونەتەوە".

لە سنووری قەزای شنگال و لە دوای کارەسات و جینۆسایدی کوردانی ئیزدی کە لەلایەن تیرۆریستانی داعشەوە ساڵی ٢٠١٤ ڕووی دا، هەتا ئێستا ٨٠ گۆڕی بەکۆمەڵ دۆزراونەتەوە، کە لەو ژمارەیە ٢٠ گۆڕیان هەڵدراونەتەوە کە سەرجەم ٣٥٠ ڕووفاتیان تێدا بووە و هەتا ئێستا لەلایەن بەغداوە تەنیا ناسنامەی ١٠٤کەسیان ئاشکرا بووە.

بڕیارە سەرەتای مانگی داهاتوو ڕووفاتی ئەو ١٠٤ کەسەی کە ناسنامەیان یەکلا بووەتەوە، بگەڕێندرێنەوە سنووری شنگال و لە گوندی کۆچۆ بە خاک بسپێردرێن.













باسنيوز