وەزیرى تەندروستیی حکوومەتی هەرێمى کوردستان ڕای گەیاند لە کۆتایی مانگى دووى ئەمساڵدا پێکوتەی دژە کۆرۆنا دەگاتە عێراق و پشکى هەرێمى کوردستانیش دیاری کراوە و دەگاتە دەست هاووڵاتییان .

ئەمڕۆ پێنجشەممە ٢١ی١ی٢٠٢١ د. سامان بەرزنجى، وەزیرى تەندروستیى حکوومەتی هەرێمى کوردستان لەمیانى بەڕێوەچوونى کۆنفرانسی پێداچوونەوە بە کارى نەخۆشخانە تایبەتییەکان لە پرێس کۆنفرانسێکدا بە میدیاکانی ڕاگەیاند: "ئامانجمان کەمکردنەوەى نرخەکانە لە خزمەتگوزارییەکان لە نەخۆشخانە تایبەتییەکان، هەروەها لە ئاکارە تەندروستییەکانیش بە یاسا ڕێک خراوە و بابەتەکانى دیکە وەک چۆنیەتیى هەڵسوکەوتى نەخۆشخانەکان و ئەرکیان بەرامبەر کۆمەڵگە هەیە و یاساکەش وەک مافى نەخۆش و بەرەنگاربوونەوەى ماددە هۆشبەرەکانیش لە هەرێمی کوردستان کارى پێ دەکرێت، لەلایەکى دیکەشەوە کار لەسەر کەمکردنەوەى نرخەکان کراوە بۆ پشکنین و نەشتەرگەرى کە بواری دەرمانیش دەگرێتەوە".

وەزیری تەندروستی باسی لەوەش کرد: "وەزارەتى تەندروستى لەبارەى دەوامى پزیشکان و کارمەندانى تەندروستى و پزیشکان و دەوام و خزمەتگوزارییە تەندروستییەکان چاکسازیی کردووە".

لەبارەى وەرگرتنى پێکوتەی دژە کۆرۆنا بۆ هەرێمى کوردستان، د. سامان بەرزنجى ڕای گەیاند:" لیژنەیەکى باڵا لە هەرێمی کوردستان لەگەڵ عێراق و کۆمپانیا بەرهەمهێنەرەکانى پێکوتە لەسەر هێڵن، ئێستا لە دوو ئاراستەوە کار لەسەر وەرگرتنى پێکوتەکە دەکەین و لەڕێگەى عێراقەوە کە تایبەتە و پشکى هەرێمى کوردستان دیاری کراوە و شوێنەکانى دابەشکردنیان دیاری کراوە و ئەوانەى کە بەکارى دێنن، خولیان بۆ دەکرێتەوە، پێشبینى دەکەین لە کۆتایی مانگى دوودا پێکوتەکە بگاتە عێراق و دواتر پشکى هەرێمی کوردستانیش دەنێردرێت".

وەزیری تەندروستی ئاماژەی بەوەش کرد: "هەروەها لەگەڵ کۆمپانیاى ڤایزەر و ئەسترلێسیکا بۆ دابینکردنى پێکوتەکە کە ئەوە لەسەر ئاستى هەرێمی کوردستان گفتوگۆیان لەسەر کراوە و ئاسانکاریش لەوبارەیەوە کراوە و ئێمە داواى نرخى پێکوتەکە و کاتى گەیشتنیمان کردووە، بەڵام هێنانی ئەو پێکوتە ئاسان نییە، چونکە هەم سنووردارە هەم کۆمپانیا بەرهەمهێنەرەکان ژمارەیان کەمە".






باسنيوز