پەکەکە و حەشدی شەعبی لە شنگال کار لەسەر ئەوە دەکەن ئاوارە ئێزیدیەکان نەتوانن دەنگ بدەن

گوڵان میدیا January 13, 2021 هەواڵ

104

پەکەکە و حەشدی شەعبی لە شنگال کار لەسەر ئەوە دەکەن ئاوارە ئێزیدیەکان نەتوانن دەنگ بدەن

زیاتر لە 80٪ی کوردانی ئێزیدی لەبەر ڕەوشی ناسەقامگیری سنوورەکە و جێبەجێنەکردنی رێکەوتنی شنگال و هەبوونی میلیشیاکان ناتوانن بگەڕێنەوە سەر ماڵ و شوێنی ژیانی خۆیان، هاوکات پەکەکە و حەشدی شەعبیش لە شنگال کار لەسەر ئەوە دەکەن ئاوارە ئێزیدیەکان نەتوانن دەنگ بدەن، بەرپرسی لقی شنگالی پارتی دیموکراتی کوردستانیش جەخت لەسەر ئەوە دەکاتەوە ئەگەر ئاوارەکان دەنگ نەدەن هەڵبژاردن لە شنگال هیچ شەرعیەتێکی یاسایی نابێت.

لە چەند رۆژی رابردوو مەحما خەلیل قایمقامی شنگال ئاشکرای کرد هەتا ئێستا داتا و ئاماری تۆماری دەنگدەرانی شنگال بۆ هەڵبژاردنی داهاتووی پەرلەمانی عێراق، ڕادەستی کۆمیسیۆنی باڵای هەڵبژاردن نەکراوە و ئەمەش مەترسییە لەسەر فەوتانی دەنگی هاووڵاتییانی ئەو سنوورە.

مەحما خەلیل ئاشکراشی کرد “ئێستا خەڵکی شنگال و بەتایبەتی کوردانی ئێزیدی لەبەر ڕەوشی ناسەقامگیری سنوورەکە ناوێرن بگەڕێنەوە سەر ماڵ و شوێنی ژیانی خۆیان و بێبەشبوونیان لە مافی دەنگدان و بەشداری لە هەڵبژاردن، دەگەڕێتەوە بۆ کەمتەرخەمیی بەغدا کە هەتا ئێستا نەیتوانیوە ڕەوشی شنگال ئارام بکات و خەڵک دڵنیا بن و بگەڕێنەوە شوێنی ژیانی خۆیان”.

هاوکات (باسنیوز) لەسەرچاوەی ئاگەدارەوە زانیویەتی پەکەکە و حەشدی شەعبی کار لەسەر ئەوە دەکەن دەنگدان لە هەڵبژاردنی پێشوەختەی عێراق تەنیا لەناو شنگالدا بکرێت، ئەوەش وەکو فشارێک بێت بۆ گەڕانەوەی ئاوارەکان و ئەوەی نەگەڕایەوە لە مافی دەنگدان بێبەش بکرێن.

بەڵام، قادر قاچاخ، بەرپرسی لقی شنگالی پارتی دیموکراتی کوردستان ڕای گەیاند، نەگەڕانەوەی ئاوارەکان بۆ شنگال پەیوەندی بەو بارودۆخەوە هەیە کە پەکەکە و حەشدی شەعبی بۆ (شنگال)یان دروستکردوە، گووتی ”زیاتر لە 80٪ی ئێزیدیەکان تاوەکو ئێستا لە کامپەکانی هەرێمی کوردستان ئاوارەن و نەگەڕاونەتەوە، وابڕیاربوو شنگالیەکان لە ناو شارەکەی خۆیان دەنگ بدەن و ڕێکەوتنی هەولێر و بەغدا بۆ ئاساییکردنەوەی دۆخی شارەکە پێش هەڵبژاردن جێبەجێبکرێ، بەڵام کە نەکراوە ئەوە مافی ئاوارەکانە سندوقی دەنگدانیان وەکو جارانی پێشوو بۆیان لەناو کەمپەکان دابنرێت“.

هەروەها گووتیشی ”ئەگەر بێت و سندوق لە کەمپەکان نەبێت و ئاوارەکانی شارەکە نەتوانن دەنگ بدەن، ئەوە هەڵبژاردن بۆ شنگال هیچ شەرعیەتێکی یاسایی نابێت، چونکە سەرەڕای ئەوەش حەشدی شەعبی و پەکەکە بۆیان بکرێ تەزویر بۆ هەڵبژاردنەکە دەکەن، پێشتریش هەوڵی وا هەبووە، بەڵام لەبەرئەوەی کەمینەن دەنگەکانیان و تەزویرەکانیشیان هیچ کاریگەری نابێت“.

باسنیوز