رێڤەبەرێ‌ گشتیێ‌ باژێرڤانیان ل پارێزگەها دهۆكێ‌ دیار كر، د سالا بۆری یا 2020ێ‌دا، ل سنوورێ‌ رێڤەبەریا گشتی ب كۆژمێ‌ 36 ملیار دیناران پرۆژە هاتینە ئەنجامدان و هندەك ژی هێشتا ل ژێر ئەنجامدانێ‌ و 74 پارچە ئەرد ژی ل سەر خێزانێن شەهید و ئەنفالكریان و زیندانیێن سیاسی و قەرەبوویان هاتینە دابەشكرن.

ئەڤرۆ رۆژا پێنچشەمبی ئەندازیار دیار بەحری رەسول، رێڤەبەرێ‌ گشتیێ‌ باژێرڤانیان ل پارێزگەها دهۆكێ‌ د كۆنگرەیەكێ‌ رۆژنامەڤانیدا دیار كر: "د سالا بۆریدا ئەو شیاینە 76 پرۆژەیان ب كۆژمێ‌ 32 ملیار دیناران ل سنوورێ‌ رێڤەبەریا گشتی ئەنجام بدەن، هەروەسا ل سەر پێشینەیێن هەیڤانە یێن باژێرڤانیا ب كۆژمێ‌ 4 ملیار دیناران پرۆژە هاتینە ئەنجامدان".

زێدەتر گۆت: "ژ وان پرۆژەیان ژی، 18 پرۆژە نها ل ژێر ئەنجامدانێ‌ نە، 31 پرۆژە ب دووماهی هاتینە، 23 پرۆژە د قۆناغا راگەهاندنێ‌ دانە و سێ‌ پرۆژە ل سەر بۆدجەیا رێكخراوێن بیانی بووینە".

ناڤبری ئەو یەك ژی ئاشكرا كر كو: "د سالا بۆری دا 25 سەرۆك باژێرڤانیی ژ سەرجەمێ‌ 47 رێڤەبەران هاتینە گوهۆرین، 18 فەرمانبەر هاتینە خانەنشینكرن و شەش فەرمانبەران وەغەر كریە و 484 زێدەگاڤی هاتینە تۆماركرن و 1000 مۆلەتێن نوو یێن ئاڤاكرنێ‌ هاتینە دان و 104 مۆلەتێن بازرگانی و داهاتێ‌ باژێرڤانیان ژی سێ‌ ملیار و 525 ملیۆن دینار بووینە".











باسنيوز