چەکدارانی داعش لە چوار قۆڵەوە هێرشیان کردە سەر گوندی ئوم حنتەی سەر بە قەزای خانەقین و تاوەکو ئێستا کوژراوێک و بریندارێک هەیە. هاوکات چەکدارێکی داعشیش کوژراوە.

دوو هاووڵاتیی گوندەکە برینداربوون، یەکێکیان گولـلە بەر سەری کەوتووە و بەمەبەستی وەرگرتنی چارەسەری پزیشکییش رەوانەی نەخۆشخانەی فریاکەوتنی گوڵاڵە کراوە، بەڵام بەهۆی سەختیی برینەکەیەوە گیانی لەدەستداوە.

ئەو هاووڵاتییەی کوژراوە ناوی "عومەر فازڵ"ە و بریندارەکەش ناوی "ساڵح حوسێن"ە.

موقەدەم شەماڵ عەبدولڕەحمان، بەرپرسی یاریدەدەرێتیی ئاسایشی کۆکس گوت "لەو شەڕەدا چەکدارێکی داعش کوژراوە و تەرمەکەی کەوتووەتە دەستی گوندنشینان".

بەپێی زانیارییەکان دانیشتووانی گوندەکە لەگەڵ چەکدارانی داعش رووبەڕوو بوونەتەوە، هەروەها هێزەکانی سوپای عێراق و حەشدی شەعبیش چوونەتە شوێنی رووداوەکە.

شەڕ و رووبەڕووبوونەوەش دوای زیاتر لە یەک کاژێر کۆتایی هاتووە.
rudaw -