سەرکەوت کاڕەش گوتەبێژی بەرگریی شارستانی هەولێر ئەمڕۆ پێنجشەممە لە پرێس کۆنفرانسێکدا هەندێ وردەکاریی ئاگرکەوتنەوەی پاڵاوگەیەکی نەوت و غازی لە سنووری گەورکۆسک خستە ڕوو.

سەرکەوت کاڕەش ئەمڕۆ پێنجشەممە ٢٤ی١٢ی٢٠٢٠ بە میدیاکانی ڕاگەیاند: "کاتژمێر ١٠:١٠ خولەکی ئەمڕۆ پێنجشەممە تیمی بەرگریی شارستانیی گەورکۆسک ئاگادار کرایەوە کە ڕووداوێکی ئاگرکەوتنەوە لە پاڵاوگەی گەورکۆسک هەیە، بۆیە دەستبەجێ تیمی بنکەکانمان و بەتایبەت تیمی بنکەی قەزای خەبات گەیشتنە شوێنی ڕووداوەکە، بەڵام بەداخەوە لە رووداوەکە سێ کەس لە کرێکارانی پاڵاوگەکە گیانیان لەدەست دابوو، دوو کەسیش بریندار بوون".

گوتەبێژی بەرگریی شارستانی هەولێر گوتیشی: "ئێستا تیمێکی شارەزا لە بەرگریی شارستانی و دوو ئەفسەر و ئەندازیارانی سەلامەتیی کۆمپانیاکە و بنکەی پۆلیس لە شوێنی ڕووداوەکەن و لێکۆڵینەوەی تەواو لە هۆکاری ڕووداوەکە، چۆنیەتیی ڕوودانی و هاوکات زیانەکانیش دەکەن و پاشان ڕادەگەیەندرێت".

ئاماژەی بەوەش دا: "هەموو قوربانییەکانی ڕووداوەکە خەڵکی هەولێر و دەوروبەرن و بەپێی زانیارییەکانمان ڕەوشی تەندروستیی بریندارەکان باشە".

لەبارەی هۆکاری ئاگرکەوتنەوەکەش گوتی: "هێشتا ڕووداوەکە لەژێر لێکۆڵینەوە دایە، چونکە حاڵەتی گیانلەدەستدانی تێدایە و دەبێ ڕاپۆرت و لێکۆڵینەوەی ورد لە تەواوی ڕووداوەکە بکرێت پاشان دەخرێنە ڕوو".

سەرکەوت کاڕەش ڕاشی گەیاند: "ئەم پاڵاوگەیە تیمی ئاگرکوژێنەوەی تایبەتمەندییان هەیە و لەسەر ستانداردی نێودەوڵەتی کار دەکات و هەموو پێوەرە سەلامەتییەکانی تێدایە، بەڵام ئێمە ناچینەوە ناو وردەکارییەوە و با ڕێڕەوی لێکۆڵینەوە هۆکاری ڕووداوەکە دەربخات، پاشان ڕای گشتی لە هۆکاری سەرەکیی ئاگرکەوتنەوەکە ئاگادار دەکەینەوە".












باسنيوز