ئەندامێکی ئەنجوومەنی پارێزگای سلێمانی ڕای گەیاند، نزیکەی سێ ساڵ پێش ئێستا سایلۆی سلێمانی بە مەبەستی جێبەجێکردنی پڕۆژەیه‌كی نوێ ڕووخێندراوە، بەڵام تا ئێستا ھیچ پڕۆژەیەک لە شوێنەکەی دروست نەکراوەتەوە.

ئه‌مڕۆ دووشه‌ممه‌ 21/12/2020، ڕەمەزان نامیق، ئەندامی ئەنجوومەنی پارێزگای سلێمانی ڕایگەیاند:" لە سەرەتای ساڵی 2018ـه‌وە، سایلۆی سلێمانی، کە کەوتبووە ناو سه‌نته‌ری سلێمانی، به‌ مه‌به‌ستی دروستكردنی پڕۆژه‌یه‌كی تازه‌ له‌ شوێنه‌كه‌ی، به‌ ته‌قینه‌وه‌ ڕووخێندرا و شوێنەکەی پاک کرایەوە و زەوییەکە درا به‌ کۆمپانیایەک بۆ ئەوەی بەشێکی بکاتە شوێنی نیشتەجێبوون و بەشێکیشی بکاتە گەشتیاری و ھۆتیل و باخچە و سەوزایی".

ڕەمەزان نامیق گوتیشی: "ھەرچەندە ئەو کۆمپانیایەی ئەو زەوییەی بۆ ئەو کارە پێدراوە، لەبەرامبەردا سایلۆی سەیدسادق و چەند باڵاخانه‌یه‌كی حکوومیی دروست کردووە، بەڵام تا ئێستا ھیچ پڕۆژەیەکی لە شوێنی سایلۆ ڕووخاوەکەی سلێمانی دروست نەکردووە و شوێنەکە ھەروەک خۆی ماوەتەوە".

ئەو ئەندامەی ئەنجوومەنی پارێزگای سلێمانی باسی لەوەش کرد، تا ئێستا چەندان جار لەگەڵ لایەنی پەیوەندیدار لێکۆڵینەوەیان کردووە و نووسراویشیان بۆ سەرۆکایەتیی شارەوانیی سلێمانی کردووە و داوای ڕوونکردنەوە و چارەسەرکردنی کێشەکەیان کردووە، بەڵام وەڵامی پێویستیان نەدراوەتەوە و کێشەکە ھەروەک خۆی ماوەتەوە.












باسنیوز