پڕۆژه‌یه‌كی بواری كاره‌با بۆ نزیكه‌ی شه‌ست گوندی سنوری شاره‌دێیه‌كانی باسرمه ‌و هه‌ریر سه‌ربه‌قه‌زای شه‌قڵاوه‌ له بواری جێبه‌جێكردندایه‌، گوژمه‌ی پرۆژه‌كه‌ له‌سه‌ر داهاتی به‌ڕێوه‌به‌رایه‌تی دابه‌شكردنی كاره‌بای شه‌قڵاوه‌ ته‌رخانكراوه‌ و به‌ته‌واو بوونی گرفتی فشار زۆری سه‌رفیده‌ره‌كان نامێنیت و پێدانی كاره‌بای نیشتیمانی بۆ دانیشتوانی ئه‌و گوندانه‌ زیاد ده‌بێت.

پڕۆژه‌كه‌ ماوه‌ی ده ‌ڕۆژه‌ كه‌وتووەته‌ بواری جێبه‌جیكردن و به‌ته‌واوبوونی دانیشتوانی ئه‌و گوندانه‌ ڕزگاریان ده‌بێت له‌گرفتیك، كه‌ چه‌ندین ساڵه‌ به‌ده‌ستیه‌وه‌دەناڵێنن.

به‌هۆی بارگرانی زۆر له‌سه‌ر فیده‌ره‌كان دانیشتوانی گونده‌كانی ئه‌و ده‌ڤه‌ره‌ بە به‌راورد به‌شوێنه‌كانی دیكه‌ی هه‌رێمی كوردستان كه‌متر كاتژمێره‌كانی كاره‌بای نیشتیمانیان پێده‌گه‌یشت، به‌ته‌واوبوونی پرۆژه‌ی راكێشانی هێڵێكی دیكه‌و دانانی فیدرێك به‌شێوه‌ه‌كی دادپه‌روه‌رانه‌ كاره‌با ده‌گاته‌ ئه‌م ناوچه‌یه‌ش.

پڕۆژه‌ی دانانی فیده‌رێكی دیكه‌ و راكێشانی هێڵێكی تازه‌ بۆ نزیكه‌ی شه‌ست گوندی ده‌ڤه‌ره‌كه‌ له‌سه‌ر داهاتی به‌ڕێوه‌به‌رایه‌تی دابه‌شكردنی كاره‌بای شه‌قڵاوه‌ به‌بڕی (189)ملیۆن دینارجێبه‌جێده‌كرێت و كۆمپانیای جێبه‌جێكار ئه‌ركیه‌تی له‌ماوه‌ی 60 ڕۆژی كاركردن پڕۆژه‌كه‌ ته‌واوبكات.
k24 -