سەرۆكێ‌ دەستەیا بلند یا بنگەهێ‌ لالش ل پارێزگەها دهۆكێ‌ راگەهاند، ئەمریكا پشتەڤانیا خوە بۆ نووژەنكرنا پەرستگەها لالش ب كۆژمێ‌ نیڤ ملیۆن دۆلارێ‌ دیاركریە، سەرەرای هندێ‌ د ئەڤ سالە دا پەرستگەها لالش ژلایێ‌ حكومەت هەرێما كوردستانێ‌ ڤە هاتبوو نووژەنكرن، بەلێ‌ ئەو هەولددەن ل هندەك لایێن دی نووژەن بكەن.

شێخ شامۆ، سەرۆكێ‌ دەستەیا بلند یا بنگەهێ‌ لالش ل پارێزگەها دهۆكێ‌ دیار كر، كابینا نوو یا حكومەتا هەرێما كوردستانێ‌ هەلگرا كارنامەیەكا گەلەك ب هێز و كار و خەباتێ‌ یە بۆ ئاڤاكرنا كوردستانەكا ب هێز و گرنگیەكا تایبەت دێ‌ ب ئێزدیان هێتە دان. ئەم ل وێ‌ باوەریێ‌ نە دێ‌ بەرەڤ رەوشەك ب هێز چین و گۆت: بەری نها 400 ملیۆن دینار بۆ چێكرنا رێكا پەرستگەها لالش هاتبوونە تەرخانكرن و هاتبوو نووژەنكرن.

زێدەتر دبێژیت: "بالیۆزخانا ئەمریكی ل بەغدا و كونسلخانا ئەمریكی ل هەولێرێ‌ پرۆژێ‌ بەشداریكرن ل نووژەنكرنا پەرستگەهێ‌ دا راگەهاند و ئاشكرا كر كو هەر ئێك ژ بالیۆزێ‌ ئەمریكی ل بەغدا “تولەر” و كونسلێ‌ گشتی یێ‌ ئەمریكی ل هەولێر ”ستیف فەیگن” دانە دیاركرن كو ئەمریكا ب بهایێ‌ نیڤ ملیۆن دۆلاران دێ‌ بەشداریێ‌ دنووژەنكرنا پەرستگەها لالش دا كەت".

خویاژی كر كو بالیۆزێ ئەمریكا راگەهاندیە، ئەڤ پرۆژە دێ ب رێكا تیمەكێ ژ زانكۆیا پەنسلڤانیا ب هەڤكاری دگەل لێژنا سەرپەرشتا نووژەنكرنا پەرستگەها لالش دێ هێتە جێبەجێكرن.

ئاماژە ب هندێ‌ ژی دایە كو ئەمریكا ب ڤێ‌ پێنگاڤێ‌ دێ‌ هەول دەت كەلتوورێ‌ ئێزدیان ساخ بمینیت و نها دەست ب نووژەنكرنێ‌ هاتیە كرن و ئەڤ نووژەنكرنە دێ‌ بیتە ئەگەر كو لالش ب پاراستی مینیت و ئەڤ نووژەنكرنە دێ‌ ل ژێر چاڤدێریا حكومەتا هەرێما كوردستانێ‌ مینیت.











باسنيوز