دوو رۆژ بەر لە ئەنجامدانی هەڵبژاردنی شارەوانییەكانی ئیستەنبۆڵ، عەبدوڵا ئۆجەلان لە رێگەی پارێزەرەكانیەوە نامەیەكی بۆ دەنگدەرانی كورد نارد و گوتی لەم هەڵبژارنەدا بێلایەن بن و پشتگیری لە پارتێكی دیاریكراو مەكەن، ئەمەش لە كاتێكدا بوو هەدەپە بریاری دابوو پشتگیری لە كاندیدی جەهەپە ئەكرەم ئیمامئۆغلو بكات. هاوسەرۆكی هەدەپەش دەڵێ ئەو نامەیە كێشەی بۆ دروست نەكردوون.

لە كۆنگرەیەكی رۆژنامەوانیدا لەناو پەرلەمانی توركیا، سەزایی تەمەللی هاوسەرۆكی هەدەپە، لەبارەی ئەو نامەیەی ئۆجەلانەوە پرسیاریان لێ كرد و ئەویش گوتی "زمانی ئۆجەلان زمانێكی سیاسی و ئایدۆلۆژی و فەلسەفیە، ئەو شێوازی خۆی هەیە، بۆیە پێویستە بە جوانی لە پەیامەكانی تێبگەی. ئۆجەلان لە چوار نامەیدا دەردەكەوێ كە بابەتی زۆر گرنگی لەبارەی توركیاوە باس كردووە و شتی باشی خستووەتە بەردەم. بۆیە ئێمە وەكو هەدەپە لەبارەی نامەكەی ئۆجەلانەوە هیچ كێشەیەكمان بۆ دروست نەبووە و كەسیش تووڕە و زویر نیە".

لێیان پرسی ئایە ئێوە ناچار كراون كە لە نێوان سەلاحەدین دەمیرتاش و ئۆجەلاندا یەكێكیان هەڵبژێرن؟ تەمەللی ئاماژەی دا كە دەمیرتاش خۆی بە جوانی وەڵامی ئەو پرسیارەی داوەتەوە.










باسنيوز