نیوەڕۆی ئەمڕۆ چوارشەممە ١٠ی ٧ی ٢٠١٩، تۆپخانەکانی سوپای پاسدارانی ئێران سنوورەکانی سیدەکان و چیای ھەڵگوردیان تۆپباران کردووە و بە گوێرەی زانیارییەکان، منداڵێک گیانی لەدەست داوە و دوو کەسی دیکەش بریندار بوون.

لەمبارەوە ئیحسان چەلەبی، بەڕێوەبەری شارەدێی سیدەکان ڕاگەیاند: کاتژمێر ١٢:١٠ خولەکی ئەمڕۆ چوارشەممە، تۆپخانەکانی کۆماری ئیسلامیی ئێران، گوندێکی سنووری سیدەکانیان تۆپباران کرد و بەھۆیەوە منداڵێک شەھید بووە و دوو منداڵی دیکەش بریندار بوون.

ئاماژەی بەوەش کرد: تۆپبارانەکەی کۆماری ئیسلامیی ئێران لە گوندەکانی (تەلان، داسنیان و دێرێ) لە کوێستانەکانی بەربزین ڕووی داوە و یەکێک لە تۆپەکان لە بنەماڵەیەکی داوە و لەو ڕووداوەشدا زەیتوون قادر کە تەمەنی ١٨ ساڵە شەھید بووە و سیروان قادری تەمەن ٢١ ساڵ و ئیسماعیل قادری تەمەن ١٤ ساڵیش بە سەختی بریندار بوون.

بەڕێوەبەری شارەدێی سیدەکان ئاشکرای کرد کە ھێشتا تۆپبارانەکە بەردەوامە و ھۆکارەکەی بۆ بوونی بنکە و بارەگاکانی حزبی دیموکرات لەو ناوچەیە دەگەڕێتەوە، ڕوونیشی کردەوە کە جگە لە زیانە گیانییەکان، زیانێکی زۆر بە ڕەز و باخ و سرووشتی ناوچەکە گەیشتووە.








basnews