ئەندامەکێ لێژنا ووزە و سامانێن سرۆشتی ل پەرلەمانێ کوردستانێ راگەھاند، ئەنجوومەنێ وەزیرێن حکوومەتا ھەرێما کوردستانێ رازی بوو ل سەر ھنارتنا گازوایلێ بۆ پرۆژێ وێستگەھا کاشێ یا بەرھەمئینانا کارەبێ.

جیھاد دۆسکی، ئەندامێ لێژنا ووزە و سامانێن سرۆشتی ل پەرلەمانێ کوردستانێ دیار کر، پشتی رێڤەبەریێ گشتیێ کارەبا پارێزگەھا دھۆکێ سەرەدانا نڤیسینگەھا پەرلەمانێ کوردستانێ کری و داخوازا ھاریکاریێ کری بۆ وەکھەڤکرنا رێژەیا کارەبا دھۆکێ ل گەل پارێزگەھێن دی، مە دوو کۆمبوون ئەنجامدان و ب ڤێ یەکێ ژی بریار ھاتە دان رۆژانە ملیۆنەک و 500 ھزار لیترێن گازوایلێ بۆ پرۆژێ وێستگەھا کاشێ یا بەرھەمئینانا کارەبێ ل دھۆکێ بھێنە دابینکرن.

جیھاد گۆتژی: ب دابینکرنا ڤێ رێژا گازوایلێ، رۆژانە دێ مێگاواتێن کارەبێ ژ پرۆژێ وێستگەھا کاشێ یا بەرھەمئینانا کارەبێ ھێنە دابینکرن و دێ کارەبا دھۆکێ ل گەل کارەبا ھەولێر و سلێمانیێ وەکھەڤ بن.

ئەندازیار کەمال محەمەد سالح، رێڤەبەرێ گشتیێ کارەبا پارێزگەھا دھۆکێ بەری نھا دیار کر بوو، بریارا نێچیرڤان بارزانی ب تەرخانکرنا 15 ملیۆن دۆلاران بۆ چارەسەرکرنا کێشەیا کارەبا دھۆکێ و ھندەک پارێزگەھێن دی یا چاڤەرێکری بوو و ھەر زوو بریارا وی دێ ھێتە بجھئینان و پرۆژەیێ نوو یێ کارەبا دھۆکێ کو دێ بیتە ئەگەرێ چارەسەرکرنا کێشەیا کارەبا دھۆکێ و تەندەر دھێتە چێکرن و ھەر زوو دێ کۆمپانیەک دەست ب ئەنجامدانا ڤی پرۆژەی کەت.

رێڤەبەرێ گشتیێ کارەبا پارێزگەھا دھۆکێ ئاماژە ب ھندێ ژی دا بوو کو ب رێیا ڤی پرۆژەیێ نوو یێ کارەبێ، دێ بیتە ئەگەر کا بەھرا دھۆکێ ژ تۆرا کارەبا گشتی چەندە دروست بگەھیت و دێ ھێلەکا کارەبێ بۆ دھۆکێ ھێتە کێشان ب کۆژمێ 9 ملیۆن و 825 ھزار دۆلاران و دێ 38 کیلۆمەتران یا درێژ بیت و دێ شێت 400 مێگاواتێن کارەبێ بۆ دھۆکێ کێشیت، بەلێ بجھئینانا ڤی پرۆژەی دێ نێزیکی شەش مەھان ڤەکێشیت.










باسنیوز