- سەرۆکی ڕەوتی پێشەڕۆژی کورد لە سووریا ڕایگەیاند، وەک چۆن نێچیرڤان بارزانی لە ئەرکەکانی پێشتریدا سەرکەوتوو بووە، لەمەودوواش دەتوانێت لەسەر ئاستی نێودەوڵەتی نوێنەراتیی کورد بکات.



ئەمڕۆ، سێشەممە (٢٨-٥-٢٠١٩)، نێچیرڤان بارزانی بە ٦٨ دەنگی پەرلەمانتاران لە کۆی ٨١ دەنگ به‌ سەرۆکی هەرێمی کوردستان هەڵبژێردرا.



سیامەند حاجۆ، سیاسەتمەداری دیاری کوردی ڕۆژئاوای کوردستان، بە ماڵپەڕی فەرمیی پارتی دیموکراتی کوردستانی گوت: "شوێنپەنجەی نێچیرڤان بارزانی بە پێشکەوتن و پەرەپیدانی هەرێمی کوردستانەوە دیارە و، ئێستاش کاراکتەرێکی بەهێزە و دەتوانێت ڕۆڵێکی گەورە ببینێت."



ناوبراو گوتی: "ناوچەکە بە دۆخێکی هەستیاردا تێپەڕ دەبێت. نیچیرڤان بارزانی، ئەو سەرۆکە بەهێزەیە کە دەتوانێت بەرگەی هەموو ناخۆشییەکان بگرێت، وەک چۆن پێشتر ڕووبەڕووی ناخۆشییەکان بووەتەوە."



حاجۆ ئاماژەی دا: "بڕوامان بە نێچیرڤان بارزانی هەیە، چونکە دەتوانێت لەسەر ئاستی کوردستان دیموکراسی و پەرەپێدانی سیاسی و کۆمەڵایەتی دابین بکات."
kdp-