لەناو ناوەندی شاری ڕانیە، شارەوانیی سنوورەکە دەستی بەسەر ژمارەیەکی زۆر ئاژەڵی ماڵیی بەرەڵاکراودا گرت.

لەمبارەیەوە کارۆخ شەریف، لێپرسراوی باخچەکانی شارەوانیی ڕانیە ڕایگەیاند: "بەداخەوە لەناو شاری ڕانیە تا ئێستا دیاردەی بەرەڵاکردنی ئاژەڵی ماڵی بەدی دەکرێت، وێڕای زیانگەیاندن بە ھاووڵاتییان و ناشرینکردنی سیمای شار، زیانی زۆریشی بەر گوڵ و نەمام و باخچەکان گەیاندووە".

گوتیشی: "چەندین جار خاوەنی ئەو ئاژەڵانەمان ئاگادار کردووەتەوە، کە ئاژەڵەکان بەرەڵا نەکەن و بیانبەن بۆ دەرەوەی شار، بەڵام بەداخەوە وەک پێویست بەدەم داواکارییەکەمانەوە نەھاتوون".

لێپرسراوی باخچەکانی شارەوانیی ڕانیە باسی لەوەش کرد، ئەمڕۆ یەکشەممە 26/5/2019 لە ھەڵمەتێکدا توانیویانە دەست بەسەر ژمارەیەکی زۆر لەو ئاژەڵانە بگرن، پاشان لە شوێنێک کۆیان دەکەنەوە و بابەتەکەش دەدەنە دادگا، بۆ ئەوەی بڕیاری کۆتاییان لەسەر بدات.












باسنیوز