دوای ئەوەی ژمارەیەك مین و تەقەمەنی لە گوندێكی سنووری شارۆچكەی چۆمان دركەوتبوون، لەلایەن تیمێكی تایبەتی بەڕێوەبەرایەتیی گشتیی كاروباری مینی هەولێرەوە، لەو شوێنە هەڵگیرانەوە.


موخلیس شەریف، بەڕێوەبەری چالاكیی مینی سەر بە بەڕێوەبەرایەتیی گشتیی كاروباری مینی هەولێر، رایگەیاند: "دوای ئەوەی بەهۆی بارانیبارین چەندین مین و پارچەی تەقەمەنی لە گوندی "گوندەژۆر"ی سەر بە شارۆچكەی چۆمان لە دەڤەری باڵەكایەتی دەركەوتن و مەترسییان بۆ هاووڵاتییان دروست كردبوو، دوای ئاگاداركردنەومان، تیمێكی تایبەتی بەڕێوەبەرایەتیی چالاكییەكانی سەر بە بەڕێوەبەرایەتیی گشتیی كاروباری مین/ هەولێر گەیشتنە شوێنەكە".

گوتیشی: "لەلایەن تیمی (EOD) چارەسەری گونجاویان بۆ کرا كە و تەقەمەنییەکان بریتی بوون لە ژمارەیەك مین لە جۆری دژە كەسی (v69) لەگەڵ (217) پارچە تەقەمەنی".

ڕاشی گەیاند: "داوا لە هاووڵاتییان و گەشتیار و كاسبكاران دەکەین كاتێك روو لە ناوچە شاخاوییەكانی سنوورەكە دەكەن. وریا بن و لەكاتی بینینی مین، یان پارچە تەقەمەنییەكان لێیان نزیك نەبنەوە و تیمەكانمانی لێی ئاگادار بكەنەوە".













باسنیوز