عیسا نسرى: گرنگە ماف و ئەرکێن کرێکارا ب یاسا بهێنە دیارکرن
1ێ ئەیارا 1886ێ،دناڤبەرا 350 تا 400 هزار کرێکارا ل شیکاغو دەست ژ کارى بەردا و داخوازا مافێن بێهنڤەدانێ کرن، ژبەر ڤێ چەندێ ئەڤ رۆژە بوو رۆژا جیهانیا کرێکاران و ل پرانیا وەلاتێن جیهانى دبیتە بێهنڤەدانا فەرمى ل هەمى دام و دەزگەهان، ژبۆ ڤێ ئێکێ عیسا نسرى، سەرۆکێ ئێکەتیا کریکارێن کوردستانێ تایێ دهۆک بۆ مالپەرێ فەرمیێ پارتى دیموکراتى کوردستان گۆت:" دخوازم ژ خودان کارا ئەڤێ رۆژێ بکەنە بێهنڤەدان بۆ کرێکارا یان ژى شیریناهیا لسەر کرێکارا بەلاڤ بکەن دوان کارێن نەشێن تێدا بێهنڤەدان بهێتەکرن، ژبەرکو کرێکارا لڤێ رۆژێ داخوازا مافێ خوکر بوو، دهەمان دەمدا دخوازم خودان کار پارێ کرێکارا ئەڤرۆکە زێدە بکەن و پاداشتەکى وەک خەلات پێشکێشى وان بکەن".
دەربارەیى چالاکیێن دئێنە ئەنجامدان عیسا نسرى خویاکر:" بەرى چەند رۆژا خرڤەبوونەک بۆ خوارنێ بۆ 100 کریکاران ژلایێ خودان کارەکى ڤە هاتبوو دروست کرن و ئەڤە ژى تشتەکێ نوو بوو کرێکار دبینن، دیسان 100 کرێکاران وەک خوبەخش 100 بتلێن خوینێ ل نەخوشخانەیا دهۆک پێشکێشى نەخوشێن تالاسیمایێ کرن، هەروەسا ل رۆژێن داهاتى ل قەزایێن سەر ب پارێزگەها دهۆکێ ڤە هەمان چالاکى دێ ئێنە ئەنجامدان و دێ بەردەوام بین لسەر داخوازا بجهئنانا مافێن کرێکارا".
سەرۆکێ ئێکەتیا کرێکاران تایێ دهۆک زەلالکر:" دێ یاداشتەکێ پێشکێشى پەرلەمان و حکومەتا هەرێما کوردستانێ کەین و هەمى گلە و گازندێن کریکارا دگەل ماف و ئەرکێن وان یێن یاسایى داخواز کەین، کۆ ئەو یاسایێن دروست بهێنە بجهئینان و یێن پێدڤى ب هەموارکرنێ بهێنە هەموارکرن".
دەربارەیى یاسایێن گرێدایى کرێکارا نسرى ئاشکەرا کر:" کرێکارێن هەرێما کوردستانێ پێدڤى ب یاسایەک نوو نە، ژبەر ئەڤ یاسایێن عێراقى یێن نوکە دکەڤنن و سەر ڤى سەردەمى ناگونجن، هەر چەندە ل عێراقێ دوو یاسا گرێدایى مافێ کرێکارا هەنە کۆ ل سالا 1987ێ ژمارا 71 و یا دوویێ 2015ێ ژمارا 37 یاسا کارى یە و یاسا 2015ێ ئەم گەلەک باشتر دبینن ژ یاسایا کەڤن و دخوازین ئەڤ یاسایە ب بریارەکا پەرلەمانى بکەڤیتە بوارێ بجهئینانێ هەتا کو پرۆژە یاسایەک نوو ل هەرێما کوردستانێ بۆ کرێکارا دئێتە دارشتن و پەسەندکرن".
kdp-
