فرۆكێن توركیا ب توندی دەردۆرا ئامێدی بۆردومان كرن
ئەحمەد موستەفا ئێك ژ ئاكنجیێن سەنتەرێ باژێركێ ئامێدیێ د داخویانیەكێ دا بۆ باسنیوز دا دیاركرن: ئەڤرۆ ل دەمژمێر (2:00) پشتی نیڤرۆ، فرۆكێن توركیا ب توندی بۆردومانا بنگەهێن پەكەكێ ل سنورێ قەزا ئامێدیێ كریە و هەتا نۆكە زیان نەهاتینە زانین.
هەمان ئاكنجیێ سەنتەرێ ئامێدیێ ئەو چەندە ژی بۆ باسنیوز دوپاتكر: ئەڤرۆ ژ بەر كو بنگەهێن پەكەكێ ل دەڤەرا مە هەنە و ژ ئەگەرێ وان ژی فروكێن سوپایێ توركیا بەردەوام بۆردومانا دەڤەرێن مە دكەن. زێدەباری زیانێن گیانی زۆر زیانێن ماددی ژی ل دیڤ بۆردومانێ دروست دبن.
ناڤهاتی ئەو چەندە ژی دوپات كر: د رۆژا بۆری دا هەر ژ ئەگەرێ هەبوونا بنگەهێن پەكەكێ، فرۆكێن توركیا مزگەفتەكا گوندێ (كانی مازێ) یا سەر ب ناحیا چەمانكێ ل سنورێ قەزا ئامێدیێ ڤە بۆردومان كریە و ئەو مزگەفتە ب تەمامی هاتیە ژ ناڤبرن و هند ژێدەر دوپات دكەن كو زیانێن گیانی بەر ب پەكەكێ كەفتینە .
هەژی دیاركرنێ یە ل سنورێ قەزا ئامێدیێ ب گشتی د ماوێ سالەكا بۆری دا (18) كەس كو خەلكێ سڤیل یێ قەزا ئامێدیێ بوون ژ ئەگەرێ بۆردومانا فروكێن توركیا بو سەر پەكەكێ شەهید بوونە و زێدەباری كو زیانێن مەزن یێن مادی گەهشتینە سەرانسەری خەلكێ قەزا ئامێدیێ.
باسنيوز
