بەرەی تورکمانیی عێراقی پێی وایە ئاساییبوونەوەی پەیوەندییەکانی هەولێر و ئەنقەرە گرنگە بۆ رۆژهەڵاتی ناوەڕاست.

ئەمڕۆ دووشەممە 29-4-2019، مەولود چاویشئۆغڵو، وەزیری دەرەوەی تورکیا لە سەردانەکەیدا بۆ هەولێر، لەگەڵ حزب و لایەنە تورکمانییەکان کۆ بووەوە.

دوای کۆبوونەوەکە، ئایدن مەعروف، پەرلەمانتاری بەرەی تورکمانی لە پەرلەمانی کوردستان بە کەناڵی (کوردستان 24)ی راگەیاندووە، کۆبوونەوەکەیان لەگەڵ مەولود چاویشئۆغڵو پشتیوانییەکی مەعنەوییە بۆ تورکمانەکانی کوردستان و عێراق.

ئایدن مەعروف جەختی لەوە کردووەتەوە، کە ئاساییبوونەوەی پەیوەندییەکانی هەرێمی کوردستان و تورکیا بۆ کوردستان، تورکیا و رۆژهەڵاتی ناوەڕاست گرنگە.

ئەو پەرلەمانتارەی بەرەی تورکمانی ئاماژەی بەوەش کردووە، کە تورکیا خوازیارە پەیوەندییەکانی لەگەڵ هەرێمی کوردستان بەهێزتر بکات و ئەو سەردانەی وەزیری دەرەوەی ئەو وڵاتەش بۆ هەمان مەبەستە.

درەنگانی شەوی یەکشەممە 28-4-2019، مەولود چاویشئۆغڵو، وەزیری دەرەوەی تورکیا بە سەرۆکایەتیی شاندێکی باڵای ئابووریی و دیپلۆماسی، گەیشتە هەولێر.

ئەمڕۆ دووشەممە مەسرور بارزانی، راوێژکاری ئەنجومەنی ئاسایشی هەرێمی کوردستان و کاندیدی پارتی دیموکراتی کوردستان بۆ سەرۆکی حکوومەتی هەرێمی کوردستان لەگەڵ وەزیری دەرەوەی تورکیا کۆبووەوە.

لە کۆبوونەوەکەدا، مەسرور بارزانی و مەولود چاویشئۆغڵو تاوتوێی پەیوەندییەکانی هەولێر و ئەنقەرەیان کردووە.







باسنيوز