گوتەبێژی سەرکردایەتیی کەرکووک - گەرمیانی پارتی دەڵێت دۆخی کەرکوک لەبار نییە بۆ ھەڵبژار دن و دەبێت دۆخی ئەو شارە ئاسایی بکرێتەوە، دواتر بڕیار لەسەر پرۆسەی بەڕێوەچوونی ھەڵبژاردن بدرێت.



عەدنان کەرکووکی، بۆ (باسنیوز) گوتی: "دوای خیانەتی ١٦ی ئۆکتۆبەر کەرکووک داگیر کراوە و حوکمی سەربازیی تێدایە، ئەو شارە بووەتە سەربازگە و ھەتا ئەو دۆخەش ئاسایی نەبێتەوە، ھەرچی دامەزراوەی مەدەنی ھەیە بایەخی نییە، بینمان لە رۆژانی رابردوو بە بڕیارێک رێگا نەدرا ئەندامانی ئەنجومەن پارێزگار بچنە بینای پارێزگاوە".

ئەو بەرپرسەی پارتی گوتیشی: "بەم دۆخەی ئێستاوە ھەڵبژاردن لە کەرکووک ئەستەمە، چونکە دەنگدەر دەبێت فشاری لەسەر نەبێت بۆ ئەوەی دەنگی خۆی بدات، بەڵام شارێک دۆخێکی ئاوای ھەبێت، ئەستەمە بتوانرێت بە ئاسانی و بەبێ گرفت ھەڵبژاردنی تێدا بکرێت".



هەر لەمبارەوە ئازاد کورەچی، سەرۆکی لیستی میللەتی تورکمانی لە پەرلەمانی کوردستان و جێگری سەرۆکی پارێزگای هەولیر ئاشکرای دەکات: "سەرۆک بارزانی باش لە پەیوەندیی کورد و تورکمان لە کەرکووک گەیشتووە دەشڵێت: "سەرۆک بارزانی وەک مەرجەعی کوردستان دەبینین لێگەیشتنی باشی لەسەر پەیوەندی کورد و تورکمان ھەیە و ھەر گرفتێک ھەبێت لەو شارە و پەیوەندی بە کورد و تورکمان ھەبێت بارزانی وەک تاکە مەرجەعی چارەسەری گرفتەکان دەبینرێت."







باسنیوز