ئەندامێکی سەرکردایەتیی یەکێتیی نیشتمانیی کوردستان کە ماوەیەکی کەمە ڕیزەکانی بزووتنەوەی گۆڕانی جێهێشتووە و گەڕاوەتەوە نێو یەکێتی، ڕەتی دەکاتەوە تەقە لە گۆڕی نەوشیروان مستەفا کرابێت و دەڵێت ”تەقەکان هەوایی بوون“.

پاش ئەوەی بەرپرسانی گۆڕان ڕایانگەیاند کە تەقەکردن لە گۆڕی نەوشیروان مستەفا و پێکانی وێنەکەی لە ئێوارەی ڕۆژی ١٢ی ئایاری ٢٠١٨ لەلایەن یەکێتیی نیشتمانیی کوردستانەوە، هۆکاری تێکچوونی پەیوەندیی هەردوو حزبە. عوسمانی بانیمارانی، ئەندامی سەرکردایەتیی یەکێتی ڕايگەیاند، گۆڕان لە منداڵدانی یەکێتییەوە دەرچووە و ”هەر دۆستی یەکێتین“.

بانیمارانی هاوشێوەی سەعدی پیرە، ئۆباڵی پەلاماردانی بارەگای مەکۆی سەرەکیی گۆڕانی خستە ئەستۆی ”برادەرێک“ و ڕای گەیاند: ”ئەوەی کراوە برادەرێک کردوویەتی، یەکێتی نەبووە و تەقەکە لە گۆڕی نەوشیروان مستەفا نەکراوە، ھەوایی بووە“.

سەرکردەکەی یەکێتی هەرچەندە داکۆکی لەوە دەکرد کە دەبێت پۆستی جێگری سەرۆکی هەرێمی کوردستان بۆ کاروباری پێشمەرگە و هێزە ئەمنییەکان بە یەکێتی بدرێت، چونکە ”نیوەی ھێزی کوردستان ھی یەکێتییە“. بەڵام بانگەشەی ئەوەشی کرد کە ئەگەر بارودۆخی کوردستان بخوازێت، ”یەکەی ٧٠ ھەڵدەوەشێنینەوە و لەگەڵ یەکەی ٨٠ دەیکەینە یەک ھێزی نیشتمانی“.











باسنيوز