بەرپرسێ‌ رێكخستنا فەرماندەیا شنگال یا پێشمەرگەهێ كوردستانێ‌ دیار كر پەكەكێ‌ ناڤێ‌ خانەسۆرێ بخوە یێ‌ كریە رۆژئاڤا و سیاسەتا خوە یا رۆژئاڤا ل خانەسۆرێ ژی بجه دئینت. نها كۆنترۆلا خانەسۆرێ دەستی پەكەكێ‌ و حەشدا شەعبی دایە.

خەلیل شڤان، بەرپرسێ‌ رێكخستنا فەرماندەیا شنگال یا پێشمەرگەهێ كوردستانێ‌ دیار كر: "پەكەكێ‌ خانەسۆرێ بخوە یا كریە رۆژئاڤا و پلانا وان یا سیاسی ئەو دگەل حەشدا شەعبی دژاتیا دەڤەرێ دكەن. نۆكە ژی ل كۆمەلگەها خانەسۆرێ پەكەكێ‌ و حەشدا شەعبی پێكڤە كار دكەن بۆ پاراستنا بەرژوەندیێن خوە یێن تایبەت چونكو هەردوو لایەنان بەرژوەندی دگەل ئێك هەنە. هەر حەشدا شەعبی نەهێلت پەكەكێ‌ شنگال چوول بكەت".

مەحما خەلیل، قایمقامێ‌ قەزا شنگال دیار كر: "خانەسۆرێ پشكەكا ژ شنگال و شنگال ژی پشكەكا ژ مووسل ئەوژی پارێزگەهەكا عێراقی یە ونابیت سەروەریا عێراقێ بهێتە پێشێلكرن و زێدەگاڤی ل سەر سەروەریا عێراقی دكەن".

ئاشكەرا كر:" ئیدارا شەرعی یا شنگال نازڤرتە شنگال ب ڤێ‌ رەوشا نۆكە ل شنگال هەی هەتا هێزەكا ئەمنی یا دروست بهێتە چێكرن بۆ شنگال یان ژی هێزێن هەڤپشك بۆ شنگال بهێنە دروستكرن وئێمناهیا دەڤەرێ و ئیدارا شەرعی بهێتە پاراستن دێ‌ ل وێ‌ دەمێ‌ ئەم ڤەگەرینە شنگال".











باسنيوز