سەعات ٣ى پاشنیوەڕۆی ئەمڕۆ ٢٠١٩/٤/١٠، هێمن هەورامی، جێگرى سەرۆكی پەرلەمانی كوردستان، بە ئامادەبوونی د. ڕێبوار بابكەیی، سەرۆكی لیژنەی پەیوەندییەكان و ڕەوەندی كوردستان لە پەرلەمانی كوردستان، پێشوازیی لە كلاریس پاستۆرى، بەرپرسی یەكێتیی ئەوروپا لە هەرێمی كوردستان كرد.

لە دیدارەكەدا هێمن هەورامی، جێگرى سەرۆكی پەرلەمانی كوردستان، كورتەیەكی سەبارەت بە كارەكانی پەرلەمان لە ماوەى دەستبەكاربوونیدا خستە ڕوو و ڕایگەیاند: "ڕێكارە یاساییەكانی پەرلەمان بۆ كاراكردنەوەى دامەزاروەى سەرۆكایەتیی هەرێمی كوردستان دوای خوێندنەوەى یەكەم و دووەم بۆ پڕۆژە پێشنیازەكە كراوە و بەم نزیكانە لە دانیشتێكی دیكەی پەرلەماندا دەنگی لەسەر دەدرێت و بەمەش هەنگاوەكانی پێكهێنانی كابینەی نوێ هەنگاوێكی دیكە دەچێتە پێشەوە".

هەورامی باسی لە بارودۆخی سیاسیی ئەمڕۆی هەرێمی كوردستان و عێراق و پەیوەندییەكانی نێوان هەرێم و بەغدا كرد و ڕایگەیاند: "ئێستا پەیوەندییەكانی نێوان هەرێم و بەغدا لە ئاستێكی باشدایە و هیوادارین بەرەوپێشتریش بچێت و كێشەكان لەگەڵ بەغدا لە ڕێگەی دەستوورى عێراقەوە چارەسەر بكرێن، بەتایبەتى ماددەى ١٤٠ى دەستوور كە تایبەت بە كەركووك و ناوچە جێناكۆكەكانی ترە".

هەر لە دیدارەكەدا جێگرى سەرۆكی پەرلەمان باسی لە پەیوەندییەكانی نێوان هەرێمی كوردستان و یەكێتیی ئەوروپا كرد و ڕایگەیاند: "دەخوازین كە پەیوەندییەكانمان لەگەڵ یەكێتیی ئەوروپا بەرەوپێشتر بچێت و داوای لە بەرپرسی یەكێتیی ئەوروپا لە هەرێمی كوردستان کرد لە هەوڵەكانی بخاتە گەڕ بۆ دروستكردنی پەیوەندی و هەماهەنگی لە نێوانان پەرلەمانی كوردستان و پەرلەمانی ئەوروپا بە مەبەستی سوودوەرگرتن لە ئەزموونی پەرلەمانی وڵاتانی ئەوروپا، بەتایبەت لە بوارى چاكسازیی كارگێڕی و داراییدا".

كلاریس پاستۆرى، بەرپرسی یەكێتیی ئەوروپا لە هەرێمی كوردستان، خۆشحاڵیی خۆی بە نزیكبوونەوەى لایەنەكان لە یەكترى بۆ پێكهێنانی كابینەی نوێی حكوومەتی هەرێم دەربڕی و ئامادەییی خۆیشی بۆ هەموو جۆرە هاوكارییەك دەربڕی بۆ لە یەكتر نزیككردنەوەى لایەنەكان و هیوای خواست كە لە نزیكترین كاتدا كابینەی نوێی حكوومەتی هەرێمی كوردستان پێك بێت."

كلاریس پاستۆرى خۆشحاڵیی خۆیشی بە باشتربوونی پەیوەندییەكانی نێوان هەرێمی كوردستان و حكوومەتی فیدڕاڵیی عێراق دەربڕی و، هیوای خواست پەیوەندییەكان بەرەو باشتر بچن و كێشەكان بە ڕێگەى دیالۆگ و ئاشتییانە چارەسەر بكرێن."


kdp-