پێشنیوەڕۆی ئەمڕۆ، شاندێكی پارتی دیموكراتی كوردستان بە سەرۆكایەتیی هۆشیاری سیوەیلی، بەرپرسی پەیوەندییەكانی دەرەوە و بە یاوەریی ئومێد خۆشناو، سەرۆكی فراكسیۆنی پارتی لە پەرلەمانی كوردستان، سەردانی كۆنسووڵخانەی گشتیی رووسیای فیدراڵیان لە هەولێر كرد بۆ پیرۆزباییكردن لە كۆنسووڵی گشتیی نوێی ئەو وڵاتە.

سەرەتا هۆشیار سیوەیلی بە ناوی ئەنجوومەنی سەركردایەتیی پارتییەوە بەخێرهاتنی ئۆلێگ لێڤین، كۆنسووڵی گشتیی رووسیای فیدراڵی كرد و هیوای سەركەوتنی بۆ خواست.

لەو دیدارەدا باس لە پەیوەندیی لەمێژینەی گەلی كوردستان و رووسیا كرا، كە دەگەڕێتەوە بۆ چەندین سەدە، سیوەیلی سوپاسی گەل و حكوومەتی رووسیای كرد كە هەمیشە تێگەیشتنی باشیان بۆ دۆزی گەلی كوردستان هەبووە.

ئۆلێگ لێڤین، كۆنسووڵی گشتیی رووسیای فیدراڵ، سوپاسی پارتی دیموكراتی كوردستان و جەنابی سەرۆك بارزانی كرد بۆ دووپاتكردنەوەی پاڵپشتی لە ئەرك و چالاكییەكانی كۆنسووڵخانەی وڵاتەكەی لە هەرێمی كوردستان.

ئەو هەروەها رۆڵی ژەنەڕاڵ بارزانی بە گرنگ وەسف كرد لە بەهێزكردنی پەیوەندییەكانی گەلی كوردستان و ناساندنی دۆزی گەلی كوردستان بە وڵاتەكەی.

لە میانەی ئەو دیدارەدا، باس لە پەیوەندییەكانی ئێستای هەرێمی كوردستان و رووسیای فیدراڵ كرا و بە پەیوەندییەكی كاریگەر و بەسوود بۆ هەردوولا لە ڕووی سیاسی و ئابوورییەوە ناوزەد كرا. كۆنسووڵی گشتی رووسیاش پشتیوانیی وڵاتەكەی بۆ گەل و هەرێمی كوردستان دووپات كردەوە.

لە بەشێكی دیكەی دیدارەكەدا، تیشك خرایە سەر پەیوەندییەكانی هەولێر و بەغدا و سیوەیلی باسی لە روئیا و بۆچوونی سەرۆكوەزیرانی ئێستای عێراق كرد، كە جیاوازە لەوانی پێش خۆی و ئەمەش هاوكار دەبێت بۆ تێپەڕاندنی گرفت و چارەكردنی كێشەكانی نێوان بەغدا و هەولێر.

دەربارەی پێكهێنانی كابینەی نوێی حكوومەتی هەرێمی كوردستانیش، بەرپرسی پەیوەندییەكانی دەرەوەی پارتی ڕایگەیاند: "خۆشبەختانە ئێستا دەتوانین بڵێین كە لە دواقۆناغەكانی پێكهێنانی حكوومەتی نوێ نزیك بووینەتەوە".

ئاڵۆزیی ئێستای ناوچەكە، بەشێكی دیكەی ئەو دیدارە بوو و ئۆلێگ لێڤینیش رایگەیاند، وڵاتەكەی لە هەموو بارودوخێكدا رەچاوی مافەكانی گەلی كوردستان دەكات، هیوای بەدەوامبوونی سەقامگیری و بەرەوپێشچوونیشی بۆ هەرێمی كوردستان خواست.
kdp-