پێنج کەس لە سلێمانی بە چەندین تاوان دەستگیر کران و بەرپرسێکی ئاسایشیش باس لەوە دەکات، کە تۆمەتبارەکان هەوڵیان داوە دەستدرێژی بکەنە سەر قوربانییەکان.

ئەمڕۆ یەکشەممە 7-4-2019، حەسەن نوری ، بەڕێوەبەری ئاسایشی سلێمانی لە پرێس کۆنفڕانسێکدا ڕاگەیاند، پێنج کەسیان بە چەند تۆمەتێک دەستگیر کردووە، کە تۆمەتەکان بریتین لە رفاندن، کوشتن، دزینی ئۆتۆمبێل، دزینی پارە و جانتا.

حەسەن نوری هەروەها رایگەیاند، جگە لەو تاوانانە، ئەو پێنج کەسە ”کاری بەدڕەوشتییان کردووە و ئەو پارەیەی لە تاوانەکان بە دەستیان هێناوە، بۆ بەدڕەوشتی بەکاریان هێناوە“.

بەڕێوەبەری ئاسایشی سلێمانی ئاماژەی بەوەش کرد، کە دەستگیرکراوەکان پیاوێکیان بەناوی تاریق لە مانگی 12ـی ساڵی رابردوو کوشتووە و ئۆتۆمبێلەکەیان بردووە، جگە لە کوشتنی کچێکی دیکە.

هەروەک حەسەن نوری رایگەیاند، ئەو گرووپە نزیکەی چوار ساڵە خەریکی دزی و تاوانن، بەڵام دەستگیر نەکرابوون و ئێستا دەستگیر کراون.

بەڕێوەبەری ئاسایشی سلێمانی ئاشکراشی کرد، کە گرووپەکە لە ساڵی 2017ـەوە دەستیان بە تاوانی دزینی ئۆتۆمبێل و کوشتن کردووە، پێشتر تەنیا دزیی بچووکیان ئەنجام داوە و لە 2017ـەوە هەوڵیان داوە جگە لە دزینی ئۆتۆمبێل، دەستدرێژیش بکەنە سەر خاوەن ئۆتۆمبێلەکان.










باسنيوز