پارتی دیموکراتی کوردستان دەست بە گەڕێکی دیکەی سەردانەکانی بۆ لای لایەنە سیاسییەکان دەکات بۆ پێکهێنانی کابینەی نوێی حکوومەتی هەرێمی کوردستان.



بەپێی زانیارییەکان، پارتی چاوەڕێی وەڵامی یەکێتیی نیشتمانیی کوردستان و بزووتنەوەی گۆڕان دەکا بۆ دەستپێکردنەوەی سەردانەکانی، چونکە لە یەکەم سەردانییەوە، شاندی پارتی پەیامی حزبەکەی گەیاندووەتە ئەو حزبە و چاوەڕێی وەڵامی ئەو دوو حزبەیە.



دوای هەڵبژاردنی پەرلەمانی کوردستان لە 30ـی ئەیلوولی 2018، هەردوو حزبی شیوعیی کوردستان و یەکگرتووی ئیسلامیی کوردستان بڕیاریان داوە بەشداریی کابینەی نوێی حکوومەتی هەرێمی کوردستان نەکەن.



رۆژی 30ـی ئەیلوولی 2018، هەڵبژاردنی خولی پێنجەمی پەرلەمانی کوردستان ئەنجام درا و رۆژی سێشەممە 30/10/2018، ئەنجومەنی باڵای دادوەری لە هەرێمی کوردستان ئەنجامەکانی پەسەند کرد.



ژمارەی کورسیی لایەنەکان لە کۆی 100 کورسیی پەرلەمان لە خولی پێنجەم:



- پارتی دیموکراتی کوردستان، 45 کورسی.

- یەکێتیی نیشتمانیی کوردستان، 21 کورسی.

- بزووتنەوەی گۆڕان، 12 کورسی.

- نەوەی نوێ، 8 کورسی.

- کۆمەڵی ئیسلامی، 7 کورسی.

- بەرەو ئیسڵاح (یەکگرتوو و بزووتنەوەی ئیسلامی)، 5 کورسی.

- ئازادی، 1 کورسی.

- سەردەم، 1 کورسی.



پێکهاتەکان (ژمارەی کورسییەکانیان جێگیرە):



- تورکمان، 5 کورسی.

- مەسیحی و کلدان ئاشووری، 5 کورسی.

- ئەرمەن، 1 کورسی.



باسنیوز