به‌رپرسێكى یه‌كێتیى مامۆستایانى كوردستان، ئاشكراى كرد، له‌میانى به‌دواداچوونیان بۆ دامه‌زراندنى هه‌میشه‌یى مامۆستایانى گرێبه‌ست، پێیانڕاگه‌یه‌ندراوه‌ كه‌ ئه‌و بابه‌ته‌ ده‌كه‌وێته‌ دواى پێكهێنانى كابینه‌ى نوێى حكوومه‌تى هه‌رێمى كوردستانه‌وه‌.


عه‌تا ئه‌حمه‌د، جێگرى سه‌رۆكى یه‌كێتیى مامۆستایانى كوردستان ڕاگه‌یاند: "به‌پێى ناوه‌ڕۆكى گرێبه‌ستى دامه‌زراندنى مامۆستایان، ده‌بێت دواى سێ ساڵ خزمه‌ت، ئه‌و مامۆستایانه‌ به‌هه‌میشه‌یی دابمه‌زرێندرێن".


ئاماژه‌ى به‌وه‌ش دا، كه‌ له‌ماوه‌ى ساڵانى 2013 – 2016 له‌ ته‌واوى هه‌رێمى كوردستان نزیكه‌ى شه‌ش هه‌زار مامۆستا به‌ گرێبه‌ست دامه‌زراون و زۆربه‌یان خزمه‌تى سێ ساڵیان ته‌واوكردوه‌، به‌ڵام هیچ یه‌كێك له‌وانه‌ نه‌كراوه‌ته‌ دامه‌زراوى هه‌میشه‌یى.


ڕوونیشیكرده‌وه‌، به‌دواداچونیان بۆ ئه‌و بابه‌ته‌ كردوه‌ و له‌لایه‌ن وه‌زاره‌تى دارایى و په‌روه‌رده‌وه‌ پێیانڕاگه‌یه‌ندراوه‌ كه‌ به‌هۆى قه‌یرانى داراییه‌وه‌ نه‌توانراوه‌ ئه‌و مامۆستایانه‌ به‌هه‌میشه‌یی دابمه‌زرێن.



ئاشكراشى كرد، كه‌ وه‌ك وه‌ڵام بۆ ئه‌و بابه‌ته‌ زانیارییان پێدراوه‌، دواى پێكهێنانى كابینه‌ى نوێى حكوومه‌تى هه‌رێم و په‌سندكردنى بودجه‌ى 2019، ئه‌و پرسه‌ یه‌كلایى ده‌بێته‌وه‌.
bas news-