بەهۆی دەرکردنی بڕیارێک لە بارەی ناوەندەکانی خوێندنی ئیسلامی لەلایەن وەزیرێکی سەر بە یەکێتیی نیشتمانیی کوردستانەوە، کۆمەڵی ئیسلامیی کوردستان نیگەران دەبێت و بەیاننامەیەکی ناڕەزایی بڵاو دەکاتەوە.

وەزارەتی خوێندنی باڵا و توێژینەوەی زانستی حکوومەتی هەرێمی کوردستان کە یوسف گۆران لە پشکی یەکێتیی نیشتمانیی کوردستان لەو پۆستە دایە، بڕیاری داخستنی خوێندنی ئیسلامی دەر کردووە.

لە بەرامبەردا ئەمرۆ یەکشەممە ١٨/١١/٢٠١٨، فراکسیۆنی کۆمەڵی ئیسلامیی کوردستان لە پەرلەمانی کوردستان، ڕاگەیاندراوێکی بڵاو کردووەتەوە و ناڕەزایی لەبارەی بڕیارەکە دەربڕیوە و بە ”ستەمێک بۆ سەر دامەزراوە ئیسلامییەکانی هەرێمی کوردستان“ لێکی داوەتەوە.

فراکسیۆنی کۆمەڵی ئیسلامی پێیوایە کە داخستنی ئەم ناوەندانەی خوێندن ”درووستکردنی کۆسپ و لەمپەرە لەبەردەم خوێندنی ئیسلامی و دامەزراوە ئیسلامییەکانی دیکەدا“. بۆیە تەواوی بڕیارەکەی وەزارەتی خوێندنی باڵا و توێژینەوەی زانستی ڕەت کردووەتەوە.











باسنيوز