گوتەبێژی فەرمیی وەزارەتی دەرەوەی ڕووسیا ڕایگەیاند، وڵاتەكەی خوازیارە پەیوەندییەكانی لەگەڵ حكوومەتی نوێی هەرێمی كوردستاندا پتەوتر بكات.

لە كۆنگرەیەكی ڕۆژنامەوانیدا، ماریا زەخارۆڤە، گوتەبێژی فەرمیی وەزارەتی دەرەوەی ڕووسیا، لە وەڵامی پرسیارێكدا دەربارەی پەیوەندییەكانی هەرێمی كوردستان و ڕووسیا ڕایگەیاند، پەیوەندییەكی لەمێژینە و بەهێزیان لەگەڵ گەلی كوردستاندا هەیە.

زەخارۆڤە، ئاماژەی بە دیداری حەفتەی ڕابردووی نێوان میخائیل بۆگدانۆڤ، جێگری وەزیری دەرەوەی ڕووسیا و نوێنەری تایبەتی ڤلادیمیر پۆتنی سەرۆكی ڕووسیا بۆ كاروباری رۆژهەڵاتی ناوەڕاست و باكووری ئەفریقا لەگەڵ شاندی پارتی دیموكراتی كوردستان بە سەرۆكایەتیی هۆشیار سیوەلی، بەرپرسی مەكتەبی پەیوەندییەكانی دەرەوە كرد. كە لەو دیدارەدا باس لە بارودوخی ئێستای ناوچەكە و دواپێشهاتەكان كرا و، تیشك خرایە سەر پەیوەندییە سیاسی و ئابوورییەكانی نێوانیان.

گوتەبێژی فەرمیی وەزارەتی دەرەوەی ڕووسیا، هەروەها باسی لە بەڕێوەچونی پڕۆسەی هەڵبژاردنەكانی پەرلەمانی كوردستان كرد كە بە ئازادانە و دیموكراسیانە خەڵكی هەرێمی كوردستان نوێنەری خۆیان هەڵبژاردووە و گوتی: "چاوەڕێ دەكەین كە گفتوگۆكانی پێكهێنانی كابینەی نوێ بە سەرۆكایەتیی پارتی دیموكراتی كوردستان دەست پێبكەن، كە زۆرینەی دەنگەكانی بەدەست هێناوە.

ئەو گوتەبێژە، جەختیشی لە هەماهەنگی و پەیوەندیی بەهێزی حكوومەتەكەی و حكوومەتی هەرێمی كوردستان كردەوە و ڕایگەیاند: "داواكارین پارتە سیاسییەكانی هەرێمی كوردستان هەوڵەكانیان یەك بخەن بو پێكهێنانی حكوومەتێكی بەهێزی نوێ و، هیوادارین ئەو حكوومەتە لەگەڵ حكوومەتی نوێی فیدارڵدا بكەونە گفتوگۆ بۆ چارەكردنی كێشە هەڵواسراوەكانی نێوان هەولێر و بەغدا.

هیوایشی خواست پارتە سیاسییەكان پێكەوەكاركردن بكەنە ئامانجی سەرەكییان لە بەرژەوەندیی گەلانی عێراقدا.
kdp-