ژ بەر پەكەكێ هێشتا 266 زەڤیێن مینرێژكری ل ئامێدیێ نەهاتینە پاقژكرن
مەسعود مەلا شەفیق، رێڤەبەرێ دەزگەهێ مینان ل پارێزگەها دهۆكێ، دیار كر، مە ژ نوو دو زەڤیێن مینرێژكری ل سنوورێ ناحیا كانی ماسێ تەنشت دەرگەهێ سنووری یێ سەرزێری ژ مینان پاقژكرینە، بەلێ هەتا نۆكە ئەم نەشیاینە زەڤیێن مایی یێن مینرێژكری پاقژبكەین، چونكو پتریا وان دەڤەران هێزێن پەكەكێ تێدا نە و بۆردومانا دەڤەرێ ژلایێ فرۆكێن توركیا ڤە بەردەوام دهێتە كرن، لەوما ئەم نەشیاینە وان دەڤەران ژ مینا پاقژ بكەین.
مەلا شەفیق ئاماژە ب هندێ ژی دا، ل سنوورێ قەزا ئامێدیێ 266 زەڤیێن مینرێژكری هەنە كو پتریا وان ل سنوورێ ناحیا كانی ماسێ نە ب هژمارا 118 زەڤیێن مینرێژكری و گۆت ژی: د ئەڤ سالە یا 2018 دا سێ كارمەندێن رێڤەبەریا مە بووینە قوربانی راكرنا مینان، دو ژ وان گیانێ خوە ژ دەست داینە و ئێك ژی پەككەفتی بوویە.
ل پارێزگەها دهۆكێ 762 زەڤیێن مینرێژكری هاتینە تۆماركرن و هەتا نها 428 زەڤیێن مینرێژكری ماینە و نەهاتینە پاقژكرن و ب تنێ 332 هاتینە پاقژكرن. ل سەرانسەری پرێزگەهێ ب رێژا 36% زەڤیێن مینرێژكری ب تمامی هاتینە پاقژكرن و هەتا نها ژی هێشتا 64% ماینە نەهاتینە پاقژكرن و هندەك ژ وان د پلانێ دانە و هندەك ژی هێشتا نەكەفتینە د پلانا پاقژكرنێدا.
باسنیوز
