ڕاوێژكاری مەكتەبی سیاسیی پارتی ڕایگەیاند، حەفتەی دابێ پارتی دیموكراتی كوردستان كۆبوونەوەی خۆی ئەنجام دەدات و، شاندی پارتییش بۆ پێكھێنانی حكوومەتی نوێی كوردستان لەگەڵ لایەنەكاندا دەست بە گفتوگۆ دەكات.

عارف ڕووشدی، بە ماڵپەڕی فەرمیی پارتی دیموكراتی كوردستانی ڕاگەیاند: "ھیچ ھۆكارێك نییە بۆ ئەوەی تا ئێستا گفتوگۆی پێكھێنانی حكوومەتی نوێ دەستی پێ نەكردووە، بۆیە حەفتەی دابێ پارتی كۆبوونەوەی خۆی ئەنجام دەدات، لەبەر ئەوەی بڕیار لەناو پارتی دەستەجەمعییە و شاندی خۆی دیاری دەكات بۆ سەردانیكردنی لایەنەكان و گفتوگۆی پێكھێنانی حكوومەتی نوێ دەست پێدەكات".

ڕووشدی گوتیشی: "شاندی پارتی دیموكراتی كوردستان كە كاندیدەكەی بۆ سەرۆكی حكوومەت نێچیرڤان بارزانییە، ھەر خۆیشی سەردانی لایەنەكان دەكات و ئەوەی گرینگە بەرنامەی حكوومەتە و لەگەڵ لایەنەكان لەسەر بەرنامەكە رێك بكەون و ھەمووانیش پێكەوە كار بۆ جێبەجێكردنی بەرنامەی حكوومەت بكەن دوور لە مەرامی حیزبی و پێكەوە بتوانن ئەو شتانەی خەڵك گلەییان لێ ھەیە، راستی بكەنەوە".

ڕاوێژكاری مەكتەبی سیاسیی پارتی، هەروەها باسی لەوەش كرد، پارتی سەردانی ھەموو لایەنەكان دەكات و ئەوەی لەگەڵ بەرنامەی حكوومەت بگونجێت، دەتوانێ بەشداری بكات، بۆیە ئەوەی بەشداری دەكات، پێویستە پابەندی جێبەجێكردنی بەرنامەی حكوومەت بێت.
kdp-