کرمانج عیزەت قایمقامی سۆران لە لاپەڕەی خۆی لە تۆڕی کۆمەڵایەتی فەیسبووک، مژدەیەک بە دانیشتووانی شارەکە ڕادەگەیەنێت و ئاشکرای دەکات کە سەرۆکوەزیرانی هەرێمی کوردستان بڕیاری جێبەجێکردنی ژمارەیەک پڕۆژەی بۆ شاری سۆران داوە.



قایمقامی سۆران ئاماژەی بۆ ئەوە کردووە کە بۆ بەدواداچوونی پێدوایستییەکانی سۆران، ڕۆژی سێشەممە(٦-١١-٢٠١٨) عەلی عەونی ئەندامی سەرکردایەتی پارتی دیموکراتی کوردستان و بەرپرسی لقی پارتی لە سۆران لەگەڵ نێچیرڤان بارزانی سەرۆکی حکوومەتی هەرێمی کوردستان کۆبووەتەوە و چەند کێشەیەکی شاری سۆرانی خستووەتە ڕوو.



کرمانج عیزەت ڕوونیشیکردووەتەوە کە لەمیانەی کۆبوونەوەکەدا سەرۆکی حکوومەتی هەرێمی کوردستان پەیمانی چارەسەر کێشەکانی داوە و ئێستا ڕەزامەندی لەسەر جێبەجێکردنی چەند پڕۆژەیەک بۆ ئەو مەبەستە دراوە.



قایمقامی سۆران ئاشکراشی کردووە کە بڕیار لەسەر درووستکردنی یاریگایەکی سەردەمی لە شوێنی یاریگای ناوشاری سۆران و درووستکردنی یاریگایەک بۆ سەنتەری شارەدێی سیدەکان و چارەسەرکردنی زەوییە بەتاڵەکان بە لیژنەیەکی تایبەت دراوە.



ڕاشیگەیاندووە کە لە داهاتوودا ژمارەیەک پڕۆژەی دیکە بۆ شاری سۆران ڕادەگەیەنرێت
bas news-