ئەمڕۆ بەڕێوەبەرایەتیی پۆلیسی پاریزگای سلێمانی لە پرێس کۆنفرانسێکدا وێڕای ڕاگەیاندنی هەواڵی دەستگیرکردنی باندێکی دزیکردن لە سنووری سلێمانی، کۆمەلێک ئامار و داتای پەیوەندیدار بە چالاکییەکانی پۆلیسی خستە ڕوو.

سەرکەوت ئەحمەد گوتەبێژی پۆلیسی پاێیزگای سلێمانی گوتی: "پێنج کەس بە تۆمەتی پێکهێنانی گرووپ و باندێکی دزی دەستگیر کراون کە پێکەوە بە ئۆتۆمبێلێکی جامڕەشەوە هەڵیانکوتاوەتە سەر ئۆتۆمبێلی هاووڵاتییەک و پارەیەکی زۆریان لێی دزیوە".

ئاماژەی بەوەش کرد: "سەرەتا یەکێک لە تۆمەتبارەکان بە بڕیاری دادوەری دەستگیر کرا و لە لێکۆڵینەوەکداندا دانی بە تاوانەکەیدا ناوە کە خۆی بڕیای پێکهێنانی ئەو باندەی داوە و سەرەنجام پێنج کەس بەو تۆمەتە دەستگیر کراون کە جلوبەرگی سەربازییان لەبەر کردووە و ئەو تاوانەیان ئەنجام داوە و پاش دزین، پارەکەیان دابەش کردووە".

سەرکەوت ئەحمەد ڕاشی گەیاند: "بەو پارە دزراوە کە لە نێوان خۆیان دابەشیان کردووە دوو ئۆتۆمبێل لە جۆری "هیۆندا و ئەڤیۆ"ی پێ کڕدراوە کە ئێستا لە بەڕێوەبەرایەتیی نەهێشتنی تاوان لەگەڵ دوو دەفتەر دۆلار و دەمانچەیەک دەستیان بەسەردا گیراوە".

ئاماژەی بەوەش کرد: "دوو تۆمەتباری دیکەی هاوکاری ئەو باندە دزییە، هەڵاتوون و ئێستاش تیم و مەفرەزەکانی پۆلیس و ئاسایش بەدوای ئەو تاوانبارانەدا دەگەڕێن".

تۆمەتبارێکی دیکەش سەرەڕای ئەوەی کە زانیویە ئەو ئۆتۆمبێلە دزراوە، بەڵام ئۆتۆمبێلەکەی کڕیوە، کە ئەویش دەستگیر کراوە، هاوکات تۆمەتبارێکی دیکە کەلە هەولێر هەڵاتووە و هاتووەتە سلێمانی بە هەماهەنگی لەگەڵ پۆلیسی هەولێر و بەپێی مادەی 446 لە یاسای سزادانی عێراقی فەرماندی دەستگیرکردنی هەبووە، کە ئەویش دەستگیر کراوە.












باسنيوز