سەرۆکی حکوومەتی هەرێمی کوردستان پەیامێک لەبارەی هێرشکردنە سەر مەسیحییەکانی میسر بڵاو دەکاتەوە.



لە پەیامێکدا، کە رۆژی شەممە 3/11/2018 دەری کردووە و وێنەیەکی بۆ (باسنیوز) نێردراوە، نێچیرڤان بارزانی، سەرۆکی حکوومەتی هەرێمی کوردستان سەرکۆنەی ئەو هێرشە تیرۆریستییە دەکات.



نێچیرڤان بارزانی وێڕای ناردنی سەرەخۆشی بۆ کەسوکاری قوربانییان و هیوای چاکبوونەوە بۆ بریندارەکان، هاوسۆزیی گەل و حکوومەتی هەرێمی کوردستانی بۆ مەسیحییەکانی ئەو وڵاتە دەربڕیوە.



سەرۆکی حکوومەتی هەرێمی کوردستان ئاماژەی بەوەش کردووە، کە کۆمەڵگەی نێودەوڵەتی کەوتووەتە بە بەرپرسیارێتییەکی گەورە بۆ یەکخستنی تواناکان و لەناوبردنی رێکخراوی تیرۆریستی داعش و تیرۆر بە گشتی.



مەسیحییەکان لە میسر و وڵاتانی دیکەی رۆژهەڵاتی ناوەڕاست (جگە لە کوردستان)، بەردەوام رووبەڕووی دەستدرێژی، کوشتن و کردەی تیرۆریستی دەبنەوە.



رۆژی هەینی 2/11/2018، ژمارەیەک چەکدار هێرشیان کردە سەر پاسێکی گواستنەوەی مەسیحییەکان لە نزیک کەنیسەی ئەلئەنبا سامۆئیل لە پارێزگای ئەلمەنیا لە باشووری میسر.



بەپێی دوایین زانیاری، بەهۆی هێرشەکەوە حەوت هاووڵاتیی مەسیحی گیانیان لەدەست داوە و 13 هاووڵاتیی دیکەش بریندار بوون.




باسنیوز