بەرپرسێکی یەکێتیی نیشتمانیی کوردستان، ئاماژە بەوە دەدات کە کۆسرەت رەسوڵ عەلی، جێگری یەکەمی سکرتێری گشتیی یەکێتی، ”مافی خۆیەتی ڕۆڵی سکرتێری گشتی ئەو حزبە بگێڕێت“.

حەمە ھەژار، پێشمەرگەی دێرین و ئەندامی ئەنجومەنی ناوەندیی یەکێتیی نیشتمانیی کوردستان، ڕایگەیاند: "کۆسرەت ڕەسوڵ کە ئێستا جێگری یەکەمی سکرتێری گشتیی یەکێتییە، ھەموو مافێکی ئەوەی ھەیە کە ڕۆڵی سکرتێری گشتی بگێڕی و بەشێکی زۆری دەسەڵاتەکانی سکرتێری گشتیی یەکێتی بەکاربھێنێت".

ئەو بەرپرسەی یەکێتی، ئەوەشی خستە ڕوو کە کۆسرەت رەسوڵ، یەکێکە لە سەرکردە تێکۆشەرەکانی یەکێتی، ”ئەو ھەموو تەمەنی خۆی لەپێناو یەکێتی و چەپکە گوڵەکەی جەلال تاڵەبانی بەسەر بردووە، بۆیە ئومێدێکی زۆرکان بەو ھەیە کە یەکێتی ھەڵبسێنێتەوە و ھەمووان دڵمان پێی خۆشە و شانازی پێوە دەکەن“.

باسیشی لەوە کرد کە ھەرچەندە یەکێتی چەند کێشەیەکی ناوخۆی ھەیە، بەڵام یەکێتیی وەک خۆی دەمێنێتەوە. گوتیشی: ”ھەموومان چاومان لەسەر ئەوەیە کە یەکێتی بکەینەوە بە یەکێتییەکەی جاران".

ئەمە لە کاتێکدایە کە ڕۆژی پێنجشەممە 1/2/2018، لە مەراسیمی ساڵڕۆژی کارەساتەکەی 1ی شوبات کە لە شاری هەولێر بەڕێوە چوو، تاجە گوڵیەی کۆسرەت ڕەسوڵ وەک سکرتێری گشتیی یەکێتی لەسەر مۆنۆمێنتی شەهیدانی 1ی شوبات دانرا.











باسنیوز