لە سبەی پێنجشەممەوه‌ بۆ ماوەی یەك هەفتە، دابەشكردنی فۆرمی دامەزراندن بۆ كاركردن لەناو خاڵی سنووری نێودەوڵەتی باشماخ، لەناو یەكەم تاقیگەی گەورەی خۆماڵی، كە تایبەتە بەكاری پشكنین و دڵنیایی هەموو ئەو كەلوپەلانەی كە رۆژانە لەوڵاتی ئێرانەوە لەو دەروازە سنوورییە هاوردەی هەرێمی كوردستان ده‌كرێت دەستیپێدەكات و بۆ ئەو مەبەستەش وردەكاری دارمەزراندنەكە ئاشكرادەكرێت.



بەپێی راگەیاندراوێكی خاڵی سنووری نێودەوڵەتی باشماخ، كە وێنەیەكی نێردراوه‌ و له‌ به‌شێكیدا هاتووە"كۆمپانیایه‌كى ناوخۆیی، لەناو كۆمەڵگای دەروازەی نێودەوڵەتی باشماخ، پێوستی بە(20) كارمەند هەیە لە هەردوو رەگەزی نێر و مێ، بەمەبەستی كاركردن لەناو تاقیگەی ناوەندی كۆمەڵگای باشماخ، كە پێویستە دەرچووانی زانكۆ و پەیمانگاكانی كوردستان بن".



هاوكات ئاماژە بەوەكراوە، پێویستە خوازیار بۆ دامەزراندن خەڵكی سنووری شارۆچكەی پێنجوێن بێت و بۆ وەرگرتنی فۆرمیش لەسبەی پێنجشەممەوه‌ رێكەوتی (2/11/2017) سەردانی هۆبەی یاسایی مەرزەكە بكات و لەرێكەوتی (9/11/2017) دوا رۆژی وەرگرتنەوەی فۆرمەكان دەبێت.



لەراگەیاندراوەكەی خاڵی سنووری نێودەوڵەتی باشماخ، ئەوەش خراوەتە روو،"مەرجەكان بۆ دامەزراندن لەیەكەم تاقیگەی گەورەی پشكنین و دڵنایی بەشە جیاوازەكان، بریتیە لەوەی كە دەبێت داواكار هەڵگری بڕوانامەی (دبلۆم، بەكالوریوس، ماستەر، دكتورا) بێت و شارەزایی تەواویشی لەكۆمپیوتەردا هەبێت، بەتایبەت بەرنامەكانی (وۆرد و ئیكسل)".



له‌و ڕاگه‌یه‌نراوه‌كه‌دا مەرجی ئەوەش دیاریكراوە كە پێویستە ئەو كەسانەی خوازریاری دامەزراندنن لەناو باشماخ، خەڵكی سنووری پێنجوین بن، واتە دانیشتووی ئەو سنوورە بێت و دەشبێت لەهیچ فەرمانگەیەكی حكوومی و كەرتی تایبەت دانەمەزرا بێت و كاری دیكەی نەبێت.

bas news-