نوێنەری حکوومەتی ھەرێمی کوردستان لە فەڕەنسا ئاشکرای کرد، حکوومەتی فەڕەنسا بە شێوەیەکی فەرمی، سەرۆکی هەرێمی کوردستانی بۆ سەردانیکردنی پاریس بانگهێشت کردووە.

عەلی دۆڵەمەری، نوێنەری حکوومەتی ھەرێمی کوردستان لە فەڕەنسا، رایگەیاند: ”حکوومەتی فەڕەنسا بەفەرمی بانگهێشتی مەسعود بارزانی، سەرۆکی ھەرێمی کوردستانی کردووە“.

ئەوەشی ئاشکرا کرد کە ئەگەر هەیە لە ئایندەیەکی زۆر نزیکدا کاتی سەردانەکە دیاری بکرێت. گوتیشی: ”لە هەمان کاتدا بڕیارە ڕۆژی پێنج شەممە 5/9/2017، حەیدەر عەبادی، سەرۆک وەزیرانی عێراق، کاتژمێر 9 چاوی بە سەرۆکی فەرەنسا بکەوێت< ئامانج لە دیدارەکە پرسی داعش و تاوتوێکردنی کاردانەوەکانی دوای ڕیفراندۆمی سەربەخۆیی کوردستانە کە فەڕەنسا جەخت لەسەر پشتیوانیی ھەردوولا دەکاتەوە بۆ ئەوەی گفتوگۆکان بەردەوامییان ھەبێت".

دۆلەمەری جەختی لەوە کردەوە کە سەردانەکەی بارزانی و عەبادی لەیەک کاتدا نابێت. ڕوونیشی کردەوە: ”کۆبوونەوەی بەرپرسانی باڵای فەڕەنسا لەگەڵ بارزانی، لەبارەی هەوڵ و هەنگاوەکانی کوردستان بۆ قۆناغی دوای ڕیفراندۆمی سەربەخۆیی کوردستان دەبێت“.









باسنيوز