شەوی ڕابردوو لەکاتی دانانی چەند بازگەیەکی کاتیدا لە سنووری شاری کەلار، ئۆتۆمبێلێکی جۆری BMW بەخێراییەکی زۆر خۆی دەکات بەنێو کارمەندانی ئاسایش و پۆلیسی ھاتوچۆدا و ھەڵدێت، دواتر ئۆتۆمبێلەکە بەجێ دەھێڵرێت و دەستی بەسەردا دەگیرێت.

کارزان مەجید، بەرپرسی ڕاگەیاندن و پەیوەندییەکانی بەڕێوەبەرایەتیی ھاتوچۆی گەرمیان، ڕایگەیاند: "شەوی ڕابردوو کارمەندانی ھاتوچۆی گەرمیان و ئاسایشی گەرمیان، چەند بازگەیەکی کاتییان لەسەر شەقامی جووت سایدی کەلار - گردەگۆزینە و کەلار - رزگاری داناوە، لەکاتی ڕێنمایی و لێپێچینەوە لە شۆفێران، ئۆتۆمبێلێکی جۆری BMW بەخێراییەکی زۆر خۆی کردووە بەناو کارمەندانی ھاتوچۆ و ئاسایشدا و ھەڵات".

ئەو بەرپرسەی ھاتوچۆی گەرمیان، ئەوەشی خستە روو: "دواتر ھێزێکی ھاوبەشی ئاسایش و پۆلیسی ھاتوچۆ دوای ئۆتۆمبێلەکەدا کەوتوون و لە شوێنێکدا بەجێ ھێڵراوە و سەرنشینەکانی ھەڵاتوون و دەست بەسەر ئۆتۆمبێلەکەیاندا گیراوە و لێکۆڵینەوە لەوبارەیەوە بەردەوامە".













باسنيوز