بەرپرسێکی باڵای رێکخراوی تیرۆریستی داعش لە شارۆچکەی حەویجە لە باشووری رۆژئاوای کەرکووک کوژرا.



بەپێی هەواڵی میدیا عێراقییەکان، فڕۆکە جەنگییەکانی عێراق بارەگایەکی داعشیان لە ناوەڕاستی حەویجە بۆردومان کردووە.



بەهۆی بۆردومانەکەوە، ئەبو عومەر ئەلعێراقی، بەرپرسی لێکۆڵینەوەی داعش و چوار چەکداری پاسەوانی، کە لە بازگەکە بوون، کوژراون.



بۆردومانەکە ترس و دڵەڕاوکێیەکی زۆری لای چەکدارانی داعش دروست کردووە و بەشێکیان لە ترسی کوژران، بارەگاکانیان چۆڵ کردووە و هەڵاتوون.



لە مانگی حوزەیرانی 2014 و لە سەردەمی سەرۆک وەزیرانیی نوری مالیکی، دوای هەرەس هێنان و شکستی سوپای عێراق، شارۆچکەی حەویجە لە پارێزگای کەرکووک و شاری شنگال و زۆربەی ناوچەکانی پارێزگاکانی نەینەوا، سەڵاحەدین، دیالە و ئەنبار لەلایەن چەکدارانی رێکخراوی توندڕەوی داعش داگیر کران.



باسنیوز