کارگێڕی مەکتەبی سیاسیی یەکگرتووی ئیسلامیی کوردستان، ڕای دەگەیەنێ، کە سەر لە ئێوارەی ئەمڕۆ دووشەممە، لەسەر کاراکردنەوەی پەرلەمان، لەگەڵ یەکێتیی نیشتمانی کۆدەبینەوە.

خەلیل ئیبراھیم، کارگێڕی مەکتەبی سیاسیی یەکگرتووی ئیسلامیی کوردستان، ڕایگەیاند: "ئێستا یەکێـتیی نیشتمانیی کوردستان، جموجوڵێکی لەسەر کاراکردنەوەی پەرلەمان ھەیە، بۆ ئەوەش دیارە روونکردنەوەی خۆی ھەیە، بۆیە لەسەر خواست و داوای یەکێتی سەر لە ئێوارەی ئەمڕۆ دووشەممە 11/9/2017 کۆدەبینەوە".

ئەو بەرپرسەی یەکگرتوو، ئەوەشی خستە روو کە لە کۆبوونەوەیان لەگەڵ یەکێتیی، گفتوگۆ لەسەر ئەو بابەتانە دەکەن، کە ئەوان لەگەڵ کۆمەڵ، گۆڕان و پارتی پێشتر قسەیان لەسەر کردووە و بیر و راکانیان ئاڵوگۆر دەکەن.

ئەمڕۆ دووشەممە، شاندێکی یەکێتیی نیشتمانی، بە سەرپەرەشتیی مەلا بەختیار، لەگەڵ شاندێکی کۆمەڵی ئیسلامی بە سەرپەرەشتیی عەلی باپیر، لەسەر پرسی کاراکردنەوەی پەرلەمان کۆبوونەوە.

بڕیارە سبەی سێشەممە 12/9/2017 کۆبوونەوەی سێ قۆڵی لە نێوان یەکێتـی، گۆڕان و پارتی لەسەر پرسی کاراکردنەوەی پەرلەمانی کوردستان لە مەکتەبی سیاسیی یەکێتی لە ھەولێر ئەنجام بدرێت.












باسنیوز