خەلکێ پارێزگەها دهۆکێ، پێشتەڤانیا خۆ بۆ ئەنجامدانا ریفراندۆمێ دیارکر و رێژەکا زۆرا خەلکى پشکدارى بانگەشا ریفراندۆمێ بووینە و دەست ب ئاهەنگ و بەلاڤەکرنا پوستەر و بەلاڤوکان کریە، هندەک پوستەر برێکا فرۆکان ل ئەسمانى لسەر خەلکى هاتینە بەلاڤەکرن.

ل 5 سبتمبەرا ئەڤ سالە، کومسیونا بلندا هەلبژارتن و راپرسیان هەوا بانگەشا ریفراندۆمێ راگەهاند، جەماوەرێ پارێزگەها دهۆکێ ب گەرمى پێشوازى لڤێ بریارێ کر، (رزگار کیستەیى)، رەوشەنبیر و هۆزانڤان، بۆ مالپەرێ فەرمیێ پارتى دیموکراتى کوردستان راگەهاند:" بەهرا پتریا خەلکێ کوردستانێ یێ کار بۆ سەرئێخستنا ریفراندۆمێ دکەن، لێ خەلکێ پارێزگەها دهۆکێ ب رێژەکا پتر و گەرمتر هاتیە د گۆرەپانێ دا بۆ سەرکەفتنا ریفراندۆمێ".

(رزگار کێستەیى)، بەحسکر لوێ ئێکێ ژى کر:" تا نهۆ من کەسەک ل پارێزگەها دهۆکێ سەر ب هەمى لایەنێن سیاسى ڤە نەدیتیە، کۆ دژایەتى یان نەخێر بۆ ریفراندۆمێ بکار ئینا بیت".

(کیستەیى)، ئاماژەدا:" گۆمان لسەر کوردبوونا بەریى نەخێر دروست دبیت، جونکى ریفراندۆما هەرێما کوردستان نەک مینا ریفراندۆما پارچەکا ئورۆپى یە کۆ دڤێت ژ وەلاتەکێ دیموکرات ڤەبیت، لێ کوردان دڤێت ژ زولم و بن دەستیێ رزگار ببن، ژبەر ڤێ ئێکێ ئەڤ هەوا بانگەشا ریفراندۆمێ ل دهۆکێ دئێتەکرن یا رەوایە و لدووڤ بنەمایێن دیموکراتیەتیێ یە".

(هێرش رەشید)، چالاکڤان و بەرپرسێ رێکخراوا مەند بۆ یەکسانیێ، بۆ مالپەرێ فەرمیێ پارتى دیموکراتى کودرستان خویاکر:" ملیون پوستەر بۆ پێشتەڤانیا ریفراندۆما هەرێما کوردستانێ چاپکرینە و ئەڤ پوستەرە یێن برێکا فرۆکەیان ل سەرانسەرى پارێزگەها دهۆکێ دئێنە بەلاڤکرن".

(هێرش رەشید)، زەلالکر ژى:" ئەڤ پوستەرە ب هاریکاریا کۆمپانیا M.R.F و ئاڤا گارە و بلان بازار و کۆمپانیا کەڤى هاتینە دروستکرن، دهەمان دەمدا 500 تابلو بەرهەڤکرینە و دێ لڤێ حەفتیێ ل جادەیێن دهۆکێ ئێنە هەلاویستن".

ل گۆر ئامارا کومسیونا بلندا هەلبژارتنان ل دهۆکێ، حەفت سەد و پێنچى و شەش هزار کەسان ل سنۆرێ پارێزگەها دهۆکێ مافێ دەنگدانێ هەیە.
kdp-