وەزارەتی پێشمەرگەی هەرێمی کوردستان لە چوارچێوەی گۆڕانکارییە تازەکان لە جەنگی دژ بە تیرۆردا، داواکاریی نوێی پێشکەش بە هاوپەیمانیی نێودەوڵەتی لە دژی داعش کردووە.



ھەڵگورد حیکمەت، بەڕێوەبەری دەزگای ڕۆشنبیری و ھۆشیاریی نیشتمانی لە وەزارەتی پێشمەرگە ڕاگەیاند: "داوامان لە ھاوپەیمانیی نێودەوڵەتی کردووە، پێداچوونەوە بکات لە چەند بوارێکی کارکردنیاندا لەگەڵ پێشمەرگە، بەجۆرێک ئەوەی ئێستا ھەیە، فراوانتر و گەورەتر بکرێت، چونکە قۆناغێکی نوێ لەدوای شەڕی مووسڵ ھاتووەتە ئاراوە و دەبێت پێداچوونەوە بەو ھاوپەیمانییە بکرێت، چونکە ئێستا ھێزی پێشمەرگەش خەریکی خۆئامادەکردنە بۆ قۆناغی دووەمی یەکگرتنەوەی ھێزەکانی حەفتا و هەشتا کە ئەمە قۆناغێکی گرنگە بۆ داھاتووی ھاوپەیمانیی نێوانمان“.



ئەوەشی ئاشکرا کرد کە داواکارییەکەیان بە بەرپرسانی هاوپەیمانیی نێودەوڵەتی لە لایەک و بەرپرسانی واشنتۆن لەلایەکی دیکە داوە و داوایان کردووە: ”سنووری ھاوکارییەکانیان بۆ پێشمەرگە فراوانتر بکەن و لەو چوارچێوەیەی ئێستا نەمێنێتەوە، چونکە ئەرکی زۆر و شتی ھاوبەشی زۆرمان بەیەکەوە ماوە".



جەختیشی لەوە کردەوە کە ئێستا هاوپەیمانان دیراسەی داواکارییەکەیان دەکەن .



لەلایەن خۆیەوە ھەژار عەزیز، بەڕێوەبەری پەیوەندییەکانی دەرەوە لە وەزارەتی پێشمەرگە، ڕاگەیاند: "داوامان کردووە ژووری ھەماھەنگی و پەیوەندی کە لە نێوان ھەولێر و واشنتۆن و بەغدا ھەیە، فراوان بکرێت و جۆری ھاوکارییەکانیش لە نێوان ھەرسێ لایەن گۆڕانکاری بەسەردا بێت".





باسنیوز