(کاوە عیدو) نونەرێ کوردێن ئیزدى د مەزنترین کەرنەڤالێ پێشتگیرکرنێ ل ریفراندۆما سەربەخۆیا کوردستانێ راگەهاند، کوردستان هەر دەم جهێ پێکڤە ژیان و پاراستنا هەمى پێکهاتەیان بوویە بیێ جوداهى.

ل 11تیرمەها ئەڤ سالە، لێژنا بلندا ریفراندۆمێ ب سەرپەرشتیا سەرۆکێ هەرێما کوردستانێ (مەسعوود بارزانى) و یێ پێکهاتى ب چەندین پێکهاتەیێن کوردستانێ سەرەدانا پەرلەمانێ ئورۆپا ل بروکسل کر و بەحس ل پاراستنا مافێن هەمى پێکهاتەیێن کوردستانى یێن ئاین و نەتەوەیى کر، ژبەر ڤێ ئێکێ پێکهاتەیێن کوردستانێ پتر رژد بوون لسەر بریاردانا سەربەخۆیا خۆ.

(کاوە عیدو خەتارى) نونەرێ کوردێن ئیزدى د مەزنترین کەرنەڤالێ پێشتگیرکرنێ ل ریفراندۆما سەربەخۆیا کوردستانێ، بۆ مالپەرێ فەرمیێ پارتى دیموکراتى کوردستان گۆت: "ئەم یێ بەرهەڤیا مەزنترین کەرنەڤالێ پێشتگیرکرنێ ل ریفراندۆما سەربەخۆیا کوردستانێ ل هەولێر دکەین، ئەڤ کەرنەڤالە دێ ل سەرسەرانسەرى هەرێما کوردستانێ بیت (هەولێر، دهۆک، کەرکووک، هەڵه‌بجە، سلێمانى)، ب پشکداریا هەمى پێکهاتەیێن کوردستانێ (ئیزیدى و شەبەک و سائیبى و کاکەیى و سریان و کرستیان)".

(کاوە عیدو) یى خۆیاکر: "ئەڤ کەرنەڤالە یێ نیشتمانى و نەتەوەیى یە، جونکى هەمى نەتەوە و ئایین دێ پشکدار بن، کوردستان جهێ ئارامى و پێکڤە ژیان و پاراستنا هەمى پێکهاتەیان بوویە بیێ جوداهى و ب شێوەکێ ئاشتیانە سەرەدەرى دگەل هەمى لایەکى هاتیەکرن".

(خەتارى) پتر بەحسکر: "ب سەرئێخستنا ریفراندۆمێ دێ ئاشتى لدەڤەرێ بەرقەرار بیت و پێکهاتەیێن کوردستانێ دێ ژ مەترسیا کوشتن و رەڤاند و دەربەدەریێ رزگار بن".

(یوحەنا یاقو) هەولاتیەکێ مەسیحى بۆ مالپەرێ فەرمیێ پارتى دیموکراتى کوردستان زەلالکر: "ئەم ل هیڤیا سەربەخویا کوردستانێ نە، جونکى کوردستان تاکە جهە ل دەڤەرێ دێ ماف و پیرۆزیێن مە پارێزیت".

(یوحەنایى) ئاخڤت: "ئەم دبەرهەڤین بۆ پشکداریێ د هەر چالاکیەکا پێشتەڤانیێ ل ریفراندۆمێ بکەت، ژبەر ڤێ ئێکى دێ پشکدارى کەرنەڤالێ پێشتەڤانیێ ل ریفراندۆما سەربەخۆیا کوردستانێ بین".
kdp-