کوردانی رۆژئاوای كوردستان، کە بە هۆی پێکدادانەکانی ساڵی ٢٠١٤ لە کۆبانێ هەڵاتن و لە خێوەتگەی سروجی سەر بە پارێزگای ئورفای باكووری كوردستان نیشتەجێ بوون، ئێستە بەهۆی گوشارەکانی پەیەدەوە ناتوانن بگەڕێنەوە و جەژنی قوربان لە زێدی خۆیان بەسەربەرن.


ئەو هاووڵاتییە کوردانەی رۆژئاوا نزیکەی سێ ساڵ لەمەوبەر بەهۆی شەڕ و پێکدادانی رێکخراوی تیرۆریستی داعشەوە لە دژی پەیەدە هەڵاتن، ژمارەیان نزیکەی ٣٠ هەزار کەسە و زۆرینەیان ژن و منداڵن، لە ناوەندێکی مانەوە کە لەلایەن سەرۆکایەتی فەرمانگەی کارەسات و دۆخە لە ناکاوەکان لە سروج دروست کراوە، ژیان بەسەردەبەن.



ئەو قوربانییانەی جەنگ، سەرەڕای ئەوەی شەڕ و پێکدادان لە ناوچەکەیان نەماوە، بەڵام بە هۆی گوشارەکانی پەیەدەوە، ناتوانن بگەڕێنەوە زێدی خۆیان، ئەمساڵیش خەمی ئەوەیانە کە ناتوانن جەژنی قوربان لەنێو ماڵوحاڵ و وڵاتی خۆیاندا بكەن.



پەیەدە تا ئێستەش وەك دەسەڵاتێكی تاكڕەوانە، سیاسەتێكی توند بەرانبەر خەڵكی بێ لایەن یان سەر بە حزب و لایەنە كوردییەكانی تری رۆژئاوای كوردستان پەیڕەو دەكات.

bas news-