نوێنه‌رى سه‌رۆك هۆزه‌ عه‌ره‌به‌كانى خورماتوو، ڕایده‌گه‌یه‌نێت، حه‌شدى شه‌عبی رێگره‌ له‌ گه‌ڕانه‌وه‌ى 80 هه‌زار هاووڵاتی ئاواره‌ى ناوچه‌كه‌، بۆ سه‌ر زێدى خۆیان.



شێخ سائیر به‌یاتی، نوێنه‌رى سه‌رۆك هۆزه‌ عه‌ره‌به‌كانى خورماتوو،ڕاگه‌یاند: "دواى داگیركردنى هه‌ردوو شاره‌دێی سلێمان به‌گ و یه‌نگیجه‌ى سه‌ر به‌ خورماتوو له‌ لایه‌ن تیرۆریستانى داعشه‌وه‌، دانیشتووانى ئه‌و دوو شاره‌دێیه‌ ئاواره‌ بوون، به‌ڵام دواتر له‌ لایه‌ن پێشمه‌رگه‌ و ده‌زگا ئه‌منییه‌كانه‌وه‌ ئه‌و ناوچانه‌ ڕزگار كرانه‌وه‌، كه‌چی ماوه‌ى دوو ساڵ زیاتره‌ حه‌شدى شه‌عبی، رێگره‌ له‌ گه‌ڕانه‌وه‌ى 80 هه‌زار هاووڵاتی خه‌ڵكى ئه‌و دوو شاره‌دێیه‌ و گونده‌كانى ده‌وروبه‌رى بۆ زێدى خۆیان".



شێخ سائیر، گوتیشی: "له‌ ده‌وروبه‌رى خورماتوو حه‌شدى شه‌عبی ده‌ستیان به‌ تێكدان و خاپووركردنى 50 گوند كردووه‌ و ئێستاش ئه‌و چه‌كدارانه‌ ڕۆژانه‌ له‌ ناوه‌ندى شارۆچكه‌ى خورماتوو هاووڵاتیان شه‌هید ده‌كه‌ن و ده‌ڕفێنن".



داواشیكرد، میلیشیاكانى حه‌دشى شه‌عبی له‌ سنوورى خورماتوو ده‌ربكرێن: "بۆ ئه‌وه‌ى ئارامى بۆ ناوچه‌كه‌ بگه‌ڕێته‌وه‌".

bas news-