فیدراسیۆنى کوردانی سۆڤییەتی پێشوو و بیرمەندانی ڕووس و کورد، لە مێزگردێکدا لە وڵاتی ڕووسیا، بە هەموو شێوەیەک پشتگیریی خۆیان بۆ ڕیفراندۆم دووپات کردەوە و، دژایەتیی خۆیشیان بۆ هەر گۆڕانکارییەک لە ڕێکەوت و کاتی ڕیفراندۆم نیشان دا، هەروەها لە هەرێمە جیاوازەکانی ڕووسیاشدا بە مەبەستی پشتگیری بۆ ڕیفراندۆمی هەرێمی کوردستان لە چالاکی بەردەوام دەبن.

بۆ پشتگیریی ڕیفراندۆم و سەربەخۆییی کوردستان، لە ژێر چاودێری و سەرپەرشتیی فیدراسیۆنی کۆمەڵە کوردییەکانی وڵاتانی سۆڤییەتی پێشوو لە مۆسکۆی پایتەختی ڕووسیای فیدراڵ، (هۆشیار سیوەیلی)، بەرپرسی پەیوەندییەکانی دەرەوەی پارتی دیموکراتی کوردستان و پرۆفیسۆر (نادر نادرۆڤ)، هاوکات (ناسیح غەفوور ڕەمەزان)یش بە سکایپ بەشدارییان لە مێزگردەکەدا کرد، کە گفتوگۆیەکی چڕی نووسەر و بیرمەندانی کورد و ڕووس بوو، سەبارەت بە بڕیاری سەرکردایەتیی سیاسیی کوردستان لەسەر ڕیفراندۆم و سەربەخۆییی باشوور.

لە مێزگردەکەدا (هۆشیار سیوەیلی)، ئاماژەی بە کورتەباسێکی مێژووی گەلی کورد کرد، سەبارەت بەو نەهامەتییانەی لە لایەن سوپای عێراقەوە لە ساڵانی 1920ەوە تا ئەمڕۆ بەسەر میللەتی کورد هاتوون، هەروەها ناوبراو باسی قۆناغی دوای ساڵی 2003شی کرد، کە چۆن کوردستان بە هەموو توانایەوە بۆ دووبارەبنیاتنانەوەی عێراقی نوێ لەسەر بنەمای ڕێزگرتن لە بنەما دیموکراتییەکان و مافی سەرجەم پیكهاتەکان بەشداریی کرد، ''بەڵام بەداخەوە دەسەڵاتدارانی عێراق وەک هەمیشە هاوبەشی و مافی گەلی کورد و پێکهاتەکانی تریان پشتگوێ خست، وەک بڕینی بوودجەی کوردستان و هاوکارینەکردنی هێزی پێشمەرگەی کوردستان لە شەڕی دژ بە تیرۆریستانی داعش و ئاوارەکانی هەرێمی کوردستان و زۆر بابەتی تری دەستووری، کە بە زیاتر لە 55 ماددە هەژمار دەکرێت، لە لایەن دەسەڵاتی ناوەندەوە پێشێل کراون.''

هەر لەگەڵ بیستنی هەڵویستی جەنابی سەرۆک (مەسعوود بارزانی) سەبارەت بە ڕیفراندۆم و سەربەخۆییی کوردستان، فیدراسیۆنی کۆمەڵە کوردییەکانی وڵاتانی سۆڤییەتی پێشوو، وەک یەکەم دامەزراوەى فەرمی، سەردانی کوردستانیان کرد و لەگەڵ سەرۆکی هەرێمی کوردستان و سەرجەم پارت و لایەنە سیاسییەکان کۆ بوونەوە، بۆ ئەوەی سوور تر بن لەسەر پڕۆژەی ڕیفراندۆم و سەربەخۆییی کوردستان، هاوکات پاڵپشتی و هاوکاریشیان دووپات کردەوە، ئەمڕۆش ئەم کار و چالاکیانە درێژەپێدەری ئەم هەڵوێستانەیانە، کە ڕۆژانە لە ناو خاکی وڵاتانی سۆڤییەتی پێشوو و هەرێمە جیاوازەکانی ڕووسیاوە چالاکیی جۆراوجۆری تایبەت بە ڕیفراندۆم ئەنجام دەدەن.

لە کۆتایی مێزگردەکەشدا سەرجەم میوانان گفتوگۆیان لەسەر مافی گەلی کوردستان و ڕۆڵی کۆمەڵگەی نێودەوڵەتی و ئەنجومەنی ئاسایش کرد، کە لە زۆر بەند و ماددەی دەستووریدا هاتووە، ددان بە مافی نەتەوەکاندا نراوە بۆ سەربەخۆیی، کە هەڵبژاردنی کام وڵات و کام سیستمی سیاسییان بوێت، بۆ ئەوەی لە چوارچێوەیدا بژین.
kdp-