نوێنەری پارتی لە ڕووسیا: ڕووسیا هیچ هەڵوێستێکی فەرمیی لەسەر ڕیفراندۆم نییە
دەنگۆیەک لە میدیا عێراقییەکان بڵاو بووەتەوە کە گوایە حکوومەتی ڕووسیا بە فەرمی دژی ریفراندۆمی سەربەخۆیی کوردستانە و هاوکات حهیدهر مهنسوور هادی نوێنەری حکوومەتی عێراقە لە ڕووسیا دهڵێت: ڕووسیاش قبووڵی ریفراندۆم ناکات.
لەمبارەوە خۆشەوی مەلا ئیبراهیم، نوێنەری پارتی دیموکراتی کوردستان لە ڕووسیا گوتی: "بە هیچ شێوەیەک حکومەتی ڕووسیا لێدوانی فەرمی، یان هەڵوێستی فەرمی لەسەر ڕیفراندۆم نەبووە کە گوایە داوای دواخستن بکات یان دژی بەوەستێتەوە و هەڵوێستی ڕووسیا زۆر باشە، ئەگەر ڕووسیا نیگەران بوایە بە ڕیفراندۆم نەدەهات واژۆی ڕێککەوتنی نەوتی لە نێوان کوردستان و کۆمپانیای ڕۆس نەفت بکات و هەرچی دەنگۆیە لەبارەی دژایەتی ڕووسیا بۆ ئەو پرسە هەڵەیە و هیچ بنەمایەکیان نییە و لەسەر ئاستی خەڵکی ڕووسیاش پەرۆشی زۆر هەیە بۆ پرسی ڕیفراندۆم و خەڵکی زۆری لەوێ داوا دەکەن کە کوردستان مافی چارەنووسی خۆی دیاری بکات".
ئەو نوێنەرەی پارتی ئەوەشی خستە ڕوو: "هەوڵێکی زۆر هەیە لەلایەن بەرپرسانی عێراقەوە بۆ ئەوەی لەزاری بەرپرسانی ڕووسیاوە شتێک بدۆزنەوە لەدژی پرۆسەی ڕیفرادۆم بەڵام هەوڵەکەیان سەر ناگرێت".
باسنیوز
